މާލެ އުތުރުފަރާތު ބޮޑުތަކުރުފާނު މަގު ފުޅާކޮށް ހެދުމަށް، އެސަރަހައްދު ބޭނުންކުރާ އޮޑި ދޯނި ފަހަރަށް ވަގުތީ ގޮތުން އެހެން ސަރަހައްދުތަކެއް ހަމަޖެއްސުމުގެ މަސައްކަތް ކުރަމުންދާކަމަށް މޯލްޑިވްސް ޕޯޓްސް ލިމިޑެޓް (އެމްޕީއެލް) އިން ބުނެފި އެވެ.
އުތުރުފަރާތު ބޮޑުތަކުރުފާނުމަގު ފުޅާކޮށް ތަރައްގީކުރުމުގެ މަޝްރޫއުގެ ދެވަނަ ފިޔަވަހީގެ މަސައްކަތް ތިން މަސް ދުވަހުގެ މުއްދަތަކަށް ކުރިއަށް ގެންދިއުމަށް ވަނީ ހަމަޖެހިފައެވެ. މި މަސައްކަތުގެ ތެރެއިން، މާލޭ ނޯތު ހާބަރު ސަރަހައްދުގެ މަސައްކަތް މިމަހުގެ 20 ވަނަ ދުވަހު ފެށުމަށް ވަނީ ހަމަޖެހިފައެވެ.
މި މަސައްކަތް ކުރިއަށް ގެންދިއުމަށް ހަމަޖެހިފައިވަނީ 3 ސެގްމަންޓަކަށް ބަހާލައިގެނެވެ. މި މަސައްކަތުގެ ފުރަތަމަ ސެގްމަންޓްގެ މަސައްކަތްކުރުމަށް، ލޯކަލް މާރުކެޓްގެ ހުޅަނގަށް 100 މީޓަރު ސަރަހައްދުގައި ހިމެނޭ ކަނޑު އުޅަނދުތައް މިމަހުގެ19 ވަނަ ދުވަހުގެ ނިޔަލަށް ނެގުމަށް އެމްޕީއެލްއިން މީގެ ކުރިން ވަނީ އަންގާފަ އެވެ.
އެމްޕީއެލްއިން މިއަދު ނެރުނު ބަޔާނެއްގައި ބުނީ، އެސަރަހައްދު ބޭނުންކުރާ އޮޑި ދޯނިފަހަރަށް ވަގުތީ ގޮތުން އެހެން ސަރަހައްދުތަކެއް ހަމަޖެއްސުމަށް ކަމާ ބެހޭ މިނިސްޓްރީތަކާ ގުޅިގެން މަސައްކަތްކުރަމުންދާކަމަށެވެ. އެމްޕީއެލްއިން ވަނީ، އެ ސަރަހައްދު ބޭނުންކުރާ ފަރާތްތަކުގެ އެއްބާރުލުމަށް އެދިފަ އެވެ،
މި މަސައްކަތް ކުރިއަށްދާ މުއްދަތުގެ ތެރޭގައި، އޮޑި ދޯނި ފަހަރަށް ދަތިނުނުވާނެ ގޮތަށް ހިދުމަތްތައް ފޯރުކޮށްދިނުމަށް އިންތިޒާމްތައް ހަމަޖައްސާނެކަމުގެ ޔަގީންކަން އެމްޕީއެލްއިން ވަނީ ދީފަ އެވެ.
