ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ)ގެ ލޯކަލް ކައުންސިލް އިންތިހާބުގެ ޕްރައިމަރީ މިމަހު 27 ގައި ބާއްވަން ނިންމައިފި އެވެ.
މިއަދު ޕީއެންސީން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެޕާޓީގެ ޕީޖީ ލީޑަރު، އިނގުރައިދޫ ދާއިރާގެ މެމްބަރު އިބްރާހީމް ފަލާހު ވިދާޅުވީ، ޕީއެންސީގެ ޓިކެޓު ހޯދުމަށް ގިނަ އަދަދެއްގެ ކެންޑިޑޭޓުން ފޯމު ހުށައަޅާފައިވާކަމަށެވެ. އެގޮތުން، ކައުންސިލް އިންތިހާބުގައި އިންތިހާބު ކުރުމަށް ހަމަޖެހިފައިވާ ގޮނޑީގެ 94 އިންސައްތައަށް ކެންޑިޑޭޓުން ކުރިމަތިލާފައިވާކަމަށް ފަލާހު ވިދާޅުވި އެވެ.
މިއީ އެޕާޓީއަށް އޮތް ތާއީދާއި ލޯބި ފެނިގެންދާކަމެއްކަމުގައި ފަލާހު ވިދާޅުވި އެވެ.
ފަލާހު ވިދާޅުވީ، އިންތިހާބުގެ އެތެރޭގެ އިންތިހާބު އޮންނާނީ މިމަހުގެ27 ވަނަ ދުވަހުކަމަށެވެ. އަދި ޕްރައިމަރީގެ އުސޫލުތައް މިރޭ އިއުލާނުކުރާނެކަމަށް ވިދާޅުވި އެވެ.
ފަލާހު ވިދާޅުވީ ޕާޓީގެ ޓިކެޓަށް އެދި ހުށައެޅި ކެންޑިޑޭޓުންގެ ފޯމުތައް މިހާރު އިލެކްޝަންސް ކޮމިޓީން ބަލަމުންދާކަމަށާއި، ޝަރުތު ހަމަވާ ކެންޑިޑޭޓުން ކަނޑައަޅައި، ޕްރައިމަރީ ބާއްވާނެ ދާއިރާތައް އިއުލާންކުރާނެކަަމަށެވެ.
ފަލާހު އިތުރަށް ވިދާޅުވީ، މިއީ ޕާޓީއަކުން ބާއްވާ އެތެރޭގެ އެންމެ ބޮޑު އިންތިހާބުކަމަށެވެ. އެހެންވެ ކެންޑިޑޭޓުންނަށް ހަމަހަމަ ފުރުސަތު ލިބޭނެކަން ކަށަވަރުކުރައްވާނެކަމަށެވެ. ޕްރައިމަރީ ވަަރަށް މިނިވަން ކަމާ އިންސާފުވެރިކަމާއެެކު ކުރިއަށް ގެންދަވާނެ ކަމުގައި އޭނަ ވިދާޅުވިއެވެ.
