ސްރީލަންކާއިން އެހީއަށް އެދުމުން އެންމެ ފުރަތަމަ އިޖާބަދިން ގައުމަކީ ދިވެހިރާއްޖެ ކަމަށާއި މިވަގުތު އިސްކަމެއް ދެނީ ރައްޔިތުން ސަލާމަތްކޮށް ޒަރޫރީ ބޭނުންތައް ފުއްދައިދިނުމަށް ކަމަށް ސްރީލަންކާއިން ދިވެހިރާއްޖެއަށް ކަނޑައަޅާފައި ހުންނަވާ ސަފީރު މުހައްމަދު ރިޒްވީ ހަސަން ވިދާޅުވެއްޖެ އެވެ.
ސަފީރު މިހެން ވިދާޅުވީ، ޕީއެސްއެމް އިސްނަގައިގެން ރާޢްޖޭގެ މީޑިއާތަކާއި ގުޅިގެން ކުރިއަށްގެންދާ “ސިލޯނާއެކު ދިވެހީން” ޓެލެތޯންގައި ވާހަކަ ދައްކަވަމުންނެވެ.
ސަފީރު ވިދާޅުވީ ސްރީލަންކާގައި ހާލުގައި ޖެހިފައިވާ ފަރާތްތަކަށް އެހީވުމަށް ޕީއެސްއެމްއިން ކުރިއަށްގެންދާ ޓެލެތޯނުގައި ވާހަކަ ދައްވަކަމުން އެ ގައުމުން ރާއްޖެއަށް ކަނޑައަޅާފައި ހުންނަވާ ސަފީރު ވިދާޅުވީ ތޫފާން ދިތުވާގެ ސަބަބުން ލަންކާއަށް ބޮޑެތި ގެއްލުންތަކެއް ލިބިފައިވާކަމަށާއި، ގެއްލުންތައް ވަޒަންކޮށް ހާލުގައި ޖެހިފައިވާ ފަރާތްތައް ރައްކާތެރި ހިސާބުތަކަށް ބަދަލުކުރުމުގެ މަސައްކަތް ކުރަމުންދާކަމަށެވެ.
މިހާލަތުގައި ދިވެހިން ލަންކާއަށް ދެމުންދާ އެހީތެރިކަމާއި އެއްބާރުލުމަށް ސަފީރު މުހައްމަދު ރިޒްވީ ހަސަން ޝުކުރު އަދާކުރެއްވިއެވެ. ރިޒްވީ ވިދާޅުވީ ދިވެހި ސަރުކާރުން މިކަމުގައި އިސްނަންގަވައި ދެއްވި އެހީތެރިކަން ބަލައިގަންނަކަމަށެވެ.
ސަފީރުގެ ވާހަކަފުޅުގައި ދެ ގައުމުގެ ގުޅުމަށްވެސް ވަނީ އަލިއަޅުއްވާފައެވެ. އެގޮތުން ދެ ގައުމު ދެމެދު ޒަމާނުއްސުރެ އޮތީ އަޚުވަންތަ ގުޅުމެއް ކަމަށް ވިދާޅުވިއެވެ. އަދި ދިވެހިރާއްޖެއަކީ ލަންކާއަށް ދަތި އުނދަގޫތައް ކުރިމަތިލާންޖެހޭ ވަގުތުތަކުގައި އެންމެ އަވަހަށް ލަންކާއެކު އެއްބައިވަންތަކަން ހާމަކުރާ ޤައުމު ކަމަށް ވިދާޅުވިއެވެ. އަދި މިފަހަރުވެސް އެންމެ އަވަހަށް އެހީގެ އަތް ދިއްކޮށްލި އެއްބަޔަކީ ދިވެހިން ކަމަށް ސަފީރު ވިދާޅުވިއެވެ.
ސަފީރު ވަނީ ދެ ގައުމުގެ އަހުވަންތަ ގުޅުމަކީ ދުވަހަކުވެސް ބަދަލެއް ނާންނާނެ އެކުވެރި ގުޅުމެއްކަން ފާހަގަކުރައްވާފައެވެ. އަދި ކުރިމަގުގައި ދެ ޤައުމު އެއް އެޖެންޑާއެއްގެ ދަށުން ބައިނަލްއަޤްވާމީ މައިދާނުގައި މޫސުމީ ބަދަލުތަކާއި ދެކޮޅަށް މަސައްކަތްކޮށް ތަރައްޤީވެފައިވާ ޤައުމުތަކަށް މިކަމުގެ ނުރައްކާ އަންގައި ދިނުމަށް މަސައްކަތް ކުރަންޖެހޭ ކަމަށް ވިދާޅުވިއެވެ.
ސަފީރު ވިދާޅުވީ ލަންކާ އަދި ރާއްޖެއަކީވެސް ތިމާވެށީގެ މިފަދަ ކާރިސާތަކަށް ނާޒުކު ޤައުމުތަކަށް ވާއިރު މިފަދަ ކަންކަމުގައި ގުޅިގެން މަސައްކަތް ކުރަން ޖެހޭ ކަމަށެވެ.
ސަފީރު އިންޓަރވިއު ނިންމަވާލެއްވީ، ދިވެހިރާއްޖޭގެ ރައްޔިތުން ދެމުން ގެންދާ އެހީތެރިކަމަށް ޝުކުރު އަދާކުރައްވަމުންނެވެ.