ސްރީލަންކާއަށް ކުރިމަތިވެފައިވާ ފެންބޮޑުވުމުގެ ޙާދިސާގައި އެހީތެރިކަން ބޭނުންވެފައިވާ ދިވެހިންނަށް އަސާސީ ކާބޯތަކެތި ފޯރުކޮށްދިނުމުގެ މަސައްކަތް ދިވެހި ހައިކޮމިޝަނުން ފަށައިފިއެވެ.
ލަންކާއަށް ކުރިމަތިވެފައިވާ ފެންބޮޑުވުމުގެ ހާދިސާގައި އެހީތެރިކަން ބޭނުންވާ ފަރާތްތައް ރިޕޯޓުކުރުމަށް ވަނީ ޚާއްސަ ކޯލް ސެންޓަރެއް ގާއިމްކޮށްފައެވެ. ހައި ކޮމިޝަނުން އަންނަނީ ދިވެހީންގެ ހާލު ގާތުން ބަލަމުންނެވެ. ހައި ކޮމިޝަނުން ބުނީ އެހީތެރިކަމަށް އެދުނު ފަރާތްތަކަށް އެހީ ފޯރުކޮށްދިނުމުގެ މަސައްކަތް ފަށާފައިވާކަމަށެވެ.
ހައި ކޮމިޝަނުން ބުނީ ލަންކާގެ އެކި ސަރަޙައްދުތަކުގައި ކާބޯތަކެތި ހޯދުމަށް ދަތިވާ ދިވެހިންނަށް ކާ އެއްޗެއްސާއި ފެން ބޭނުންވާ ފަރާތްތަކަށް އެތަކެތި ދަނީ ފޯރުކޮށްދެމުންދާކަމަށެވެ. އަދި އެ ގައުމުގައި ދިރިއުޅޭ ދިވެހިންނަށް ހައިކޮމިޝަނުން ގުޅާ ދިމާވާ ދަތިތައް އޮޅުން ފިލުވާ ހާލަތު ގާތުން ދެނެގަންނަމުންދާކަމަށްވެސް ހައިކޮމިޝަނުން ބުނެއެވެ. ސްރީލަންކާގެ ކޮލޮމްބޯގެ އިތުރުން އެހެން ސަރަޙައްދުތަކުގައި ތިބި ދިވެހި ކިޔަވާ ކުދިންނަށްވެސް އެ އެހީތެރިކަން ފޮރުކޮށްދެމުންދާކަމަށްވެސް ހައި ކޮމިޝަނުން ބުންޏެވެ.
ސްރީލަންކާގައި ދިރިއުޅޭ ދިވެހިންނަށް އެހީތެރިކަން ފޯރުކޮށްދެމުން އަންނައިރު އެ ގައުމުގެ އެއަރޕޯޓުގައި ނުފުރި ތިބި ދިވެހިންގެ ހާލަތު ދެނެގަނެ އެހީވުމުގެ މަސައްކަތްވެސް ހައިކޮމިޝަނުން ވަނީ ފަށާފައެވެ. މީގެ އިތުރުން ސްރީލަންކާގެ ފެންބޮޑުވުމުގެ ހާދިސާގައި ގެއްލުންވި އެ ގައުމުގެ ރައްޔިތުންނަށް އެހީތެރިކަން ފޮރުކޮށްދިނުމަށް ހައިކޮމިޝަނުން އަންނަނީ ތައްޔާރުވަމުންނެވެ.
ލަންކާގެ ހާަލަތާއި ގުޅިގެން ސަމާލުވުމަށް އެ ގައުމުން އަންގާފައިވާތީ، ދިވެހި އެމްބަސީއިންވެސް ވަނީ މި ޢިލްތިމާސާ އެއްގޮތަށް ދިވެހިން އަމަލުކުރުމަށް އަންގާފައެވެ. އެގޮތުން ކޮންމެހެން ކުރަން ޖެހިއްޖެ ޙާލަތެއްގައި މެނުވީ ދަތުރުފަތުރު ނުކުރުމަށާއި، ޚާއްސަކޮށް ފެންބޮޑުވެ، ބިންގަނޑު ކަނޑައިގެން ދިއުމުގެ ޙާދިސާތައް ހިނގާ ސަރަޙައްދުތަކަށް ދަތުރު ނުކުރުމަށް ވަނީ އަންގާފައެވެ.އަދި ބޯކޮށް ވާރޭވެހުމާއި ވައިގަދަވާ ވަގުތުތަކުގައި ބޭރަށް ނުނިކުތުމަށާއި، ލަންކާގެ މޫސުމާއި ބެހޭ އިދާރާގެ އެންގުންތަކުގެ އަދާހަމަ ހޯދުމަށް ވަނީ އެދިފައެވެ.
ހައިކޮމިޝަނުން ނެރުނު ބަޔާނުގައި ވަނީ، ވިއްސާރައިގައި ކޯރުތައް ފުރި ބަންޑުންވަމުންދާ ކަމުގެ އިންޒާރު ކަމާއި ބެހޭ ފަރާތްތަކުން ދެމުންދާތީ، އެފަދަ ސަރަޙައްދުތަކުގައި ދިރިއުޅޭ މީހުންނާއި، ބިންތިރި ސަރަޙައްދާއި މޫދު ކައިރި ސަރަޙައްދުގައި ދިރިއުޅޭ މީހުން އިންޒާރަށް ސަމާލުވެ، ރައްކާތެރި ހިސާބުތަކަށް ދިއުމަށް އަންގާފައެވެ. އަދި އެއްވެސް އެހީތެރި ކަމަކަށް ބޭނުންވެއްޖެނަމަ، ކޮމިޝަންގެ ހޮޓްލައިން 768816666 އަށް ގުޅުމަށްވެސް ވަނީ ޢިލްތިމާސްކޮށްފައިވެއެވެ.
