ފަލަސްތީނު ރައްޔިތުންގެ ހައްގުތައް ކަށަވަރުކުރުމަށް ފަލަސްތީނުގެ ރައްޔިތުންނާއެކު ބައިނަލްއަގްވާމީ މުޖުތަމައު ތިބިކަން އަމަލީ ގޮތުން ދައްކުވައި ދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ގޮވާލައްވައިފިއެވެ.
ރައީސް އެކަމަށް ގޮވާލެއްވީ މިއަދު ފާހަގަކުރާ ފަލަސްތީނުގެ ރައްޔިތުންނާއެކު އެއްބައިވަންތަކަން ހާމަކުރުމުގެ ބައިނަލްއަގްވާމީ ދުވަހާ ގުޅިގެން މީސްމީޑިއާގައި ހިއްސާ ކުރެއްވި ޕޯސްޓެއްގައެެވެ.
ރައީސް ވިދާޅުވީ ބައިނަލްއަގްވާމީ ގޮތުން ފާހަގަކުރާ ފަލަސްތީނު ރައްޔިތުންނާއެކު އެއްބައިވައްތަކަން ހާމަކުރުމުގެ ދުވަސް ފާހަގަކުރާއިރު، ފަލަސްތީނުގެ ބިމުގައި ހާލަތު އޮތީ އަދިވެސް ގޯސްކޮށް ކަމަށެވެ. ހަމަލާތައް ހުއްޓާލުމުގެ އެއްބަސްވުމެއް އޮތް ނަމަވެސް ޔަހޫދީން މެދުކެނޑުމެއް ނެތި ގައްޒާއަށް ހަމަލާތައް ދެމުންދާކަން އެމަނިކުފާނު ފާހަގަކުރެއްވިއެވެ. މީގެ އިތުރުން ހުޅުގަނގު އަސޭރީގެ އިތުރު ބިންތައް ހިފައި ޔަހޫދީން އާބާދު ކުރުވުމާއި، ފަލަސްތީނުގެ ރައްޔިތުންގެ އާންމު ދިރިއުޅުމަށާއި ހަމަޖެހުން ގާއިމްކޮށް އިގްތިސާދީ ގޮތުން ފާގަތިކަން ހޯދުމަށް ކުރާ މަސައްކަތް ހުއްޓުވުމަށް އެކި ގޮތްގޮތުން ހުރަސްތައް ކުރިމަތިކުރުވަމުންދާ ކަމަށް ވިދާޅުވިއެވެ.
ރައީސް ވަނީ މިހާލަތުގައި ފަލަސްތީނުގެ ރައްޔިތުންނާއެކު ބައިނަލްއަގްވާމީ މުޖުތަމައު ތިބިކަން އަމަލީ ގޮތުން ދައްކުވައި ދިނުމަށް ގޮވާލައްވާ އެކުގައި މަސައްކަތްކޮށް މާނަހުރި ފިޔަޅުތައްކެއް އެޅުމަށް ގޮވާލައްވާފައެވެ. މިކަމަކީ ފަލަސްތީނުގެ ރައްޔިތުންގެ ހައްގުތައް ކަށަވަރުކޮށް އެ ގައުމުގެ ރައްޔިތުނުންގެ އުއްމީދުތައް ހާސިލްކުރުމަށް ކުރަންޖެހޭ ކަމެއްކަމަށް އެމަނިކުފާނު ވިދާޅުވިއެވެ.
ރައީސްގެ ޕޯސްޓު ނިންމަވާލެއްވީ ދިވެހިން ފަލަސްތީނާއެކު ދެމި ތިބޭނެ ކަމުގެ ޔަގީންކަން ދެއްވަމުންނެވެ. އަދި މިނިވަން މުސްތަގިއްލު ފަލަސްތީނުގެ ދައުލަތެއް ގާއިމުކޮށް 1967 ގެ ކުރީގެ ބޯޑަރުތަކަށް ރުޖޫއަވެ، އިރުމަތީ ގުދުސްއަކީ އެގައުމުގެ ވެރިރަށުގެ ގޮތުގައި ބަލައިގަތުމަށް ރާއްޖެއިން ގެންގުޅޭ ސިޔާސަތު އެމަނިކުފާނު ތަކުރާރު ކުރެއްވިއެވެ.
ދިވެހިރާއްޖެއަކީ އަބަދުވެސް ފަލަސްތީނުގެ މިނިވަން ދައުލަތަކަށް ވަކާލާތުކޮށް ކުރަމުންދާ ގައުމެކެވެ. ރައީސް ޑރ. މުހައްމަދު މުއިއްޒުގެ ސަރުކާރުން މިމައްސަލާގައި ރާއްޖެއިން ގެންގުޅޭ ސިޔާސަތު އިތުރަށް ވަރުގަދަކޮށް ބައިނަލްއަގްވާމީ އެކި މަންސަތައް ފަލަސްތީނުގެ ރައްޔިތުންގެ ހައްގުތައް ކަށަވަރުކުރުމަށް ވާކާލާތު ކުރުމަށް ދަނީ ބޭނުން ކުރަމުންނެވެ. އެގޮތުން ސަރުކާރު ވަޒީރުންނާއި އެކި އޮފިޝަލުން އަދި ހުދު ރައީސް ވަނީ ބައިނަލްއަގްވާމީ މަންސަތަކުގައި މިކަމަށް ގޮވާލައި ފަލަސްތީނުގެ ރައްޔިތުންނާއި ދެކޮޅަށް ޔަހޫދީ ދައުލަތުން ހިންގަމުންދަ ޖަރީމާތަކަށް އެ ދައުލަތާއި އެކަމުގެ އިސްވެރިން ޖަވާބުދާރީ ކުރުވުމަށް ގޮވާލާފައެވެ.
ފަލަސްތީނުގެ ރައްޔިތުންނާއެކު އެއްބައިވަންތަކަން ހާމަކުރުމުގެ ބައިނަލްއަގްވާމީ ދުވަހެއް ފާހަގަކުރަން ފަށާފައިވަނީ އދ. އާންމު މަޖިލީހުން 1977 ގައި މި ދުވަސް ފާހަގަކުރުމަށް ނިންމައިގެންނެވެ. އެގޮތުން މެންބަރު ގައުމުތަކުން މިކަމުގައި ވީހާވެސް ބޮޑަށް ބައިވެ ފަލަސްތީނުގެ ރައްޔިތުންގެ ހައްގުތައް ކަށަވަރުކުރުމަށް މަސައްކަތް ކުރުމަކީ އދ. މި ދުވަސް ފާހަގަކުރުމަށް ނިންމުމުގެ މަގްސަދެކެވެ.
