ރަސްމީ ތައުލީމުގެ ތެރޭގައި މާތީ ސާނަވީ ވޮކޭޝަނަލް ޕާތުވޭ ހިމަނާ، މާލެ ވޮކޭޝަނަލް ހައި ސްކޫލުގެ ފުރަތަމަ ބެޗްގެ ކިޔެވުން ފަށައިފިއެވެ.
މިކަމަށްޓަކާ ހާއްސަ ރަސްމިއްޔާތެއް ޕޮލިޓެކްނިކްގައި ވަނީ ބާއްވާފައެވެ. މި ރަސްމިއްޔާތު ޝަރަފުވެރިކޮށްދެއްވީ އެޑިއުކޭޝަން މިނިސްޓަރު ޑރ. އިސްމާއީލް ޝަފީއުއެވެ. މަތީ ސާނަވީގައި ހުނަރާ ތަމްރީން ދޭ ވޮކޭޝަން ޕާތުވޭގެ ކިޔެވުން ފުރަތަމަ ފަހަރަށް ރާއްޖޭގައި މިވަނީ ފަށާފައެވެ. މި ސްކޫލްގެ ކިޔެވުން ގެންދަނީ، ތައުލީމީ ވުޒާރާގެ ބެލުމުގެ ދަށުން މޯލްޑިވްސް ޕޮލިޓެކްނިކުންނެވެ.
ސަރުކާރުން މުޅިން އަލަށް ތައާރަފުކުރި މަތީ ސާނަވީގެ ވޮކޭޝަނަލް ޕާތުވޭއަކީ، ޢިލްމީ ހުނަރުވެރި ޒުވާން ގާބިލު ސިކުނޑިތަކެއް ތަރައްގީކުރުމަށް ފެށި ވަރަށް ބޮޑު، މުހިންމު މަސައްކަތެއްކަމަށް މިނިސްޓަރު ޝަފީއު ވިދާޅުވިއެވެ. ޝަފީއު ވިދާޅުވީ ތައުލީމީ ދާއިރާއިން ސަރުކާރުން ބޮޑު ހޭދައެއް ކުރަމުންދާއިރު، ދަރިވަރުންނަށް ރަސްމީ ތައުލީމުގެ ތެރެއިން ފޯރުކޮށްދޭ ފުރުސަތުތައް މިހާތަނަށް އޮތީ ވަރަށް ހަނިކޮށްކަމަށެވެ. ސަރުކާރުން މިދާއިރާއިން ފެށި މަސައްކަތްތަކުގެ ނަތީޖާ ވަރަށް ފުރިހަމަކަމަށާއި، ހުޅުވާލެވުނު ފުރުސަތުތަކުގެ ތެރެއިން މަތީ ސާނައިން ފުރުސަތު ދެވޭ ނިސްބަތް %31 އިން %49 އަށް އިތުރުކޮށްފަވާކަމަށެވެ.
މިއީ އޯލެވެލް ނިންމާ، ކުރިއަށްދާން މަގެއް ނުފެނި ތިބި އެތައް ދަރިވަރުންތަކަކަށް ފުރުސަތު ފަހިކޮށްދީ، ހުނަރުވެރި ޖީލެއް ބިނާކުރަން ސަރުކާރުން އެޅުއްވި ވަރަށް ބޮޑު ފިޔަވަޅެއްކަމަށް ވިދާޅުވިއެވެ.
“މަތީ ސާނަވީގެ ފުރުޞަތު ވަރަށް ބޮޑަށް ފުޅާވެގެން މި ދިޔައީ. ވޮކޭޝަނަލް ހައި ސްކޫލްގެ ނަމުގައި އާ ސްކޫލެއް އެސްޓޭބްލިޝްކުރެވި މި ފެށިގެންދިޔައީ. 60 ކުދިން ފުރަތަމަ މި ފެށީ. ކުރިމަގުގައި ވޮކޭޝަނަލް ޕާތްވޭއިން 500 ކުދިންނަށް ފުރުޞަތު ދިނުމަކީ ޢަމާޒު.” ވަޒީރު ވިދާޅުވިއެވެ.
ޕޮލިޓެކްނިކްގެ ސީއީއޯ ޒޫޝާން ކަމާލުއްދީން ވިދާޅުވީ، މިއީ ރަސްމީ ތަޢުލީމުގެ ލެވެލްތަކާއި މަތީ ތަޢުލީމުގެ ދާއިރާއާއި ދެމެދު އޮތް ހުސްކަން ނައްތާލަދިން ފިޔަވަޅެއްކަމަށެވެ. އޭލެވެލް ވޮކޭޝަނަލް އިސްލާމް އަދި ދިވެހި މާއްދާއަކީ މަޖުބޫރު ދެ މާއްދާއެވެ. ދެން ފުރުޞަތު ހުޅުވާލި ވޮކޭޝަނަލް ދާއިރާތަކުން އެ ކުއްޖަކު އިޚްތިޔާރުކުރި ދާއިރާއިން ކުރިއަށްދެވޭނެއެވެ. ޓެކްނިކަލް ހުރިހާ ބައިތައް ގެންދާނީ ޕޮލިޓެކްނިކްގެ ފެސިލިޓީތަކާއި ފެސިލިޓޭޓަރުންނެވެ. މި ޕްރޮގްރާމްތަކުގައި މަސައްކަތުގެ މާޙައުލުގެ ތަޖުރިބާތައްވެސް ދޭނެއެވެ.
މާލެ ވޮކޭޝަނަލް ހައި ސްކޫލްގެ ކުރިއަށްގެންދަނީ މުޅިން އައު ލޯގާއަކާއެކު، ސަރުކާރުގެ އައު ސްކޫލެއްގެ ގޮތުގައެވެ. މި ޕްރޮގްރާމް ކުރިއަށްދާނީ، އޭ ލެވެލްއަށް ކިޔަވައިދޭ ރަސްމީ އޮނިގަނޑުގެ ދަށުންނެވެ.
