މިއަހަރު ރާއްޖެއަށް ޒިޔާރަތްކުރި ދެ މިލިއަން ވަނަ ފަތުރުވެރިޔާ ރާއްޖެ ޒިޔާރަތްކޮށްފި އެވެ.
މިއަހަރު ރާއްޖެއަށް ޒިޔާރަތްކުރި ދެ މިލިއަން ވަނަ ފަތުރުވެރިޔާއަކީ އިނގިރޭސިވިލާތުގެ ރައްޔިތެއްކަމަށްވާ ބެތަނީ ސޭރާ އެވެ. އޭނާ ރާއްޖެއައީ އޭނާގެ ފިރިމީހާއާއެކު ހަނީމޫނަށެވެ. މިއީ އޭނާ ރާއްޖެ އައި ފުރަތަމަ ފަހަރެވެ.
ދެ މިލިއަން ވަނަ ފަތުރުވެރިޔާއަށް މަރުހަބާ ކިޔުމަށް ވެލާނާ އިންޓަނޭޝަނަލް އެއަރޕޯޓުގައި ވަނީ ހާއްސަ ހަފްލާއެއް ބާއްވާފަ އެވެ. މި ހަފްލާގައި ޓޫރިޒަމް މިނިސްޓަރު ތާރިގް އިބްރާހީމް ވަނީ ބައިވެރިވެވަޑައިގެންފަ އެވެ.
ރާއްޖެއަށް ދެ މިލިއަން ފަތުރުވެރިން ޒިޔާރަތްކޮށްފައިވާއިރު، ސަރުކާރުން އަމާޒު ހިފާފައިވަނީ، މިއަހަރު ރާއްޖެއަށް 2.4 ފަތުރުވެރިން ގެނައުމަށެވެ.
ރާއްޖެއަށް މިހާރު އެންމެ ގިނަ ފަތުރުވެރިން ޒިޔާރަތްކުރަނީ ޗައިނާއިންނެވެ. އެގައުމުން މިއަހަރުގެ މިހާތަނަށް309،368 ފަތުރުވެރިން ވަނީ ޒިޔާރަތްކޮށްފަ އެވެ. ދެން އެންމެ ގިނަ ފަތުރުވެރިން ޒިޔާރަތްކުރަނީ ރަޝިއާ، އިނގިރޭސިވިލާތް، ޖާމަނީ، އިޓަލީ އަދި އިންޑިއާއިންނެވެ.
ފަތުރުވެރިންނަށް ހިދުމަތްދިނުމަށް މިހާރު 1،299 ތަނަކަށް ހުއްދަދީފައިވާއިރު، މި ތަންތަނުގެ ބެޑް ކެޕޭސިޓީއަކީ 66،415 އެވެ.
