އަގުހެޔޮކޮށް ބިން ވިއްކި ކަމަށް ބުނާ ވާހަކަ ހައުސިންގް މިނިސްޓްރީން ދޮގުކޮށްފި

ބިން ގަތުމާ ގުޅިގެން، އޭރު ހުޅުމާލޭގެ ކަންކަން ބެލެހެއްޓި ރައީސް އޮފީހުގެ ހުޅުމާލެ ޑިވެލޮޕްމަންޓް ޔުނިޓުން އެ ފަރާތަށް ރަސްމީ ލިޔެކިޔުންތައް ހަވާލުކޮށްފައިވާ ކަމަށާއި، އެ ލިޔުންތައް މިހާރު ވެސް އެބަހުރި ކަމަށް މިނިސްޓްރީން ބުނެއެވެ. ނަމަވެސް، އޭގެ ފަހުން ވޭތުވެދިޔަ 23 އަހަރު ތެރޭގައި އެއްވެސް ސަރުކާރަކުން އެމީހާއަށް ބިން ހަވާލުކޮށްފައި ނުވާ ކަމަށާއި، އިންސާފު ހޯދުމަށް އެމީހާ ތަކުރާރުކޮށް މައްސަލަ ހުށަހަޅާފައިވާ ކަމަށް ވެސް މިނިސްޓްރީން ފާހަގަކުރެއެވެ.

މިނިސްޓްރީން ހާމަކުރި ގޮތުގައި، މި ސަރުކާރުން އެ މައްސަލަ ދިރާސާކުރުމަށްފަހު ނިންމާފައިވަނީ، އެއްވެސް އިތުރު ފައިސާއެއް ނެގުމަކާ ނުލައި އޭރުގެ އަގުތަކާ އެއްގޮތަށް މިހާރު ހުޅުމާލެއިން އޭނާއަށް ބިމެއް ދިނުމަށެވެ. އެގޮތުން ދޫކުރަން ނިންމި ބިމަކީ ކުރީގެ ސަރުކާރުގެ “ބިންވެރިޔާ” މަޝްރޫއުގެ ދަށުން ޝަރުތު ހަމަނުވާ މީހަކަށް ދީފައި އޮތުމުން އެއްބަސްވުން އުވާލައި، ހުސްވެފައިވާ ބިމެއް ކަމަށް ވެސް މިނިސްޓްރީން ބުންޏެވެ. މީގެއިތުރުން، މި ބިން ދޭން ނިންމީ ކުރިން ގުޅީފަޅުން އޭނާއަށް ދީފައިވާ ބިން ދޫކޮށްލަން އެއްބަސްވުމުން ކަމަށް ވެސް ފާހަގަކޮށްފައިވެއެވެ.

ހައުސިންގ މިނިސްޓްރީން އިތުރަށް ބުނީ، މި ނިންމުމަކީ ގާނޫނީ ގޮތުންނާއި އުސޫލުތަކުގެ ތެރެއިން އެންމެ ރަނގަޅަށް ނިންމާފައިވާ ނިންމުމެއްތޯ ކަށަވަރުކުރުމަށްޓަކައި އެންޓި ކޮރަޕްޝަން ކޮމިޝަން (އޭސީސީ) ގެ ލަފަޔަކަށް މިހާރު އެދިފައިވާނެ ކަމަށެވެ. އަދި އެ ބިން ރަސްމީކޮށް ހަވާލުކުރާނީ އޭސީސީގެ ލަފާގެ އިތުރުން ބޭނުންވާ ގާނޫނީ ލަފާތައް ލިބި، ހުރިހާ ކަމެއް ސާފުވުމުން ކަމުގެ ޔަގީންކަން އެ މިނިސްޓްރީން ދެއެވެ.