ވޯޓަކީ މާތް ﷲ ގެ ހަޟްރަތުގައި އަދާކުރަންޖެހޭ ބޮޑު އަމާނާތެއް ކަމަށާއި، އެކަން އަދާކުރުމުގައި ތެދުވެރިކަމާއި އިޚްލާޞްތެރިކަން އިސްކުރަންޖެހޭނެ ކަމަށް އިލެކްޝަންސް ކޮމިޝަނުގެ ރައީސް މުޙައްމަދު ޝަކީލު ވިދާޅުވެއްޖެއެވެ.
މިއަދު ފާހަގަކުރަމުންދާ ޤައުމީ ވޯޓުލާ މީހުންގެ ދުވަހުގެ މުނާސަބަތުގައި ޝަކީލު ވިދާޅުވީ، ދިވެހިރާއްޖެއަކީ ސައްތައިން ސައްތަ މުސްލިމު ޤައުމެއްގެ ބައެއް ކަމުގައިވާހިނދު، މާތްވެގެންވާ އިސްލާމްދީނުގެ ޢަދުލުވެރި އުޞޫލުތަކަށް ނަޒަރު ހިންގާއިރުވެސް ވޯޓަކީ އަމާނާތެއް ކަމަށެވެ. އަދި އެކަން އަދާކުރުމުގައި އަޅުގަނޑުމެންގެ ހިތްތަކުގައި މާތް ﷲ އަށް ބިރުވެތިވުމާއި، ތެދުވެރިކަމާއި، އިޚްލާޞްތެރިކަން އަބަދުމެ ބާއްވަންޖެހޭނެކަން އޭނާ ފާހަގަކުރެއްވިއެވެ.
ޝަކީލް އިތުރަށް ވިދާޅުވީ، ރައްޔިތުން ދޭ ކޮންމެ ވޯޓަކީ ޤައުމީ ތަރައްޤީއަށާއި، ޤާނޫނީ ހަމަހަމަކަމާއި، ދައުލަތުގެ މުއައްސަސާތަކުގެ ހަމަޖެހުމަށް ސީދާ ގޮތުންވެސް އަދި ނުސީދާގޮތުންވެސް އަސަރު ފޯރުވާނެ ނިންމުމެއް ކަމަށެވެ. އަދި ކޮންމެ ވޯޓަކީ އެ ވޯޓު ރައްދުވާ މީހެއްގެ ތެދުވެރިކަމާއި ޤާބިލުކަމުގެ މައްޗަށް ދެވޭ ހެކިބަހެއް ކަމުގައިވެސް ވިދާޅުވިއެވެ.
މިއަހަރުގެ ވޯޓުލާ މީހުންގެ ދުވަސް ރާއްޖޭގައި ފާހަގަކުރަމުންދަނީ “ވޯޓުލުމަކީ ޙައްޤެކެވެ، އަދި ޒިންމާއެކެވެ” މި ޝިއާރުގެ ދަށުންނެވެ. ރާއްޖޭގައި 2015 ވަނަ އަހަރުން ފެށިގެން ކޮންމެ އަހަރެއްގެ އޮގަސްޓް 25 ގައި މި ދުވަސް ފާހަގަކުރަމުންދަނީ ޑިމޮކްރެޓިކް ނިޒާމުގައި ރައްޔިތުންގެ ބައިވެރިވުން އިތުރުކުރުމަށާއި، ވޯޓުލުމުގެ ހޭލުންތެރިކަން މުޖުތަމައުގައި ބޮޑުކުރުމުގެ މަޤްޞަދުގައެވެ.
