ނިމިދިޔަ 2025 ވަނަ އަހަރު މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ) އަށް ސާފު ފައިދާގެ ގޮތުގައި 85 މިލިއަން ރުފިޔާ ލިބިއްޖެއެވެ.
މިއީ އޭގެ ކުރީ އަހަރާ އަޅާބަލާއިރު 88 އިންސައްތައިގެ ބޮޑު ކުރިއެރުމެކެވެ. އެމްޓީސީސީގެ އަހަރީ ރިޕޯޓް ދައްކާގޮތުން، ފާއިތުވި ފަސް އަހަރުގެ ތެރޭގައި އެ ކުންފުންޏަށް އެންމެ ކުޑަ ފައިދާއެއް ލިބުނު ކުރީ އަހަރު ލިބިފައިވަނީ 45 މިލިއަން ރުފިޔާއެވެ.
އެ ކުންފުންޏަށް 2021 ވަނަ އަހަރު 232 މިލިއަން ރުފިޔާގެ ފައިދާއެއް ލިބުނުއިރު، ނިމިދިޔަ އަހަރު ފައިދާ އިތުރުވި ނަމަވެސް، ކުންފުނީގެ ޖުމްލަ އާމްދަނި ވަނީ 1 އިންސައްތަ ދަށަށް ގޮސް 2.1 ބިލިއަން ރުފިޔާއަށް ވެއްޓިފައެވެ.ކުންފުނީގެ އާމްދަނީގެ އެންމެ ބޮޑު ބައެއް ޙިއްޞާކުރަނީ ކޮންސްޓްރަކްޝަނާއި ބިން ހިއްކުމުގެ ދާއިރާއިންނެވެ. އެއީ 1.7 ބިލިއަން ރުފިޔާއެވެ. މީގެ އިތުރުން ވިޔަފާރީގެ ބައިން 244 މިލިއަން ރުފިޔާ ލިބުނުއިރު، ދަތުރުފަތުރުގެ ދާއިރާއިން ކުންފުންޏަށް ވަނީ 150 މިލިއަން ރުފިޔާ ލިބިފައެވެ.
އެމްޓީސީސީގެ ރިޕޯޓަށް ބަލާއިރު، ޓްރޭޑިންގް އާމްދަނީ ދަށްވުމުން ޖުމްލަ އާމދަނީއަށް އަސަރުކުރިއިރު، އިދާރީ ޚަރަދުތައް 6 އިންސައްތަ މަތިވެ 367 މިލިއަން ރުފިޔާއަށް ވަނީ އަރާފައެވެ. ހިންގުމުގެ ޚަރަދު ބޮޑުވި ނަމަވެސް، މާކެޓިންގް ޚަރަދު ވަނީ 20 މިލިއަނުން 13 މިލިއަނަށް ތިރިވެފައެވެ.
