އެމްޓީސީސީގެ ހިޔާ މަޝްރޫއަށް ބިމެއް ހަމަޖެއްސުމަށް އެޗްޑީސީއާ މަޝްވަރާކޮށްފި

މި ބައްދަލުވުމުގައި އެޗްޑީސީގެ މެނޭޖިންގ ޑިރެކްޓަރު ޑީސީޕީ (ރިޓަޔަރޑް) އަޙްމަދު ސުޢޫދީ އާއި، އެމްޓީސީސީގެ މެނޭޖިންގ ޑިރެކްޓަރު ބްރިގޭޑިޔާ ޖެނެރަލް (ރިޓަޔަރޑް) ޢަލީ ޒުހައިރު ބައިވެރިވެވަޑައިގެންނެވިއެވެ. މީގެ އިތުރުން ދެ ކުންފުނީގެ ބައެއް އިސްވެރިން ވެސް ބައިވެރިވެވަޑައިގެންނެވި މި ބައްދަލުވުމުގައި، މަޝްރޫޢުގެ މަސައްކަތްތައް ހަލުވިކަމާއެކު ކުރިއަށްގެންދިއުމަށް ބޭނުންވާ ބިން ހަމަޖެއްސުމުގެ މުހިންމު ކަންކަމާ ވަނީ ފުންކޮށް މަޝްވަރާކުރައްވާފައެވެ.

އެމްޓީސީސީން ބުނީ، ‘ހިޔާ މަޝްރޫޢު’ ގެ ދަށުން އެ ކުންފުނީގެ މުވައްޒަފުންނަށް ޚާއްޞަކޮށްގެން ބިނާކުރަން ރޭވި ޓަވަރުތައް މިހާތަނަށް ވެސް ވުޖޫދަށް އައިސްފައި ނުވާތީ، އެކަމާ ކުންފުނީގެ ބޯޑާއި މެނޭޖްމަންޓުން އިންތިހާއަށް ހިތާމަކޮށް މާޔުސްވާ ކަމަށެވެ. މިއީ މުވައްޒަފުންގެ ހެވާއި ލާބައަށްޓަކައި ކޮންމެހެންވެސް ކޮށްދޭންޖެހޭ މުހިންމު ކަމެއްގެ ގޮތުގައި އެ ކުންފުނިން ދެކެއެވެ. އެގޮތުން، މި މަޝްރޫޢު އަލުން ކުރިއަށް ގެންދިއުމަށްޓަކައި ހުޅުމާލެއިން ބިމެއް ހަމަޖައްސަވައިދެއްވުން އެދި އެމްޓީސީސީގެ މެނޭޖިންގ ޑިރެކްޓަރު ވަނީ ރައީސުލްޖުމްހޫރިއްޔާގެ އޮފީހަށް ސިޓީއަކުން ހުށަހަޅުއްވާފައެވެ. އެމްޓީސީސީގެ މި ހުށަހެޅުއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އިޖާބަދެއްވައި، އެޗްޑީސީ މެދުވެރިކޮށް ބިމެއް ހަމަޖައްސަވައިދެއްވުމަށް އަންގަވާފައިކަމަށް އުކުންފުނިން މައުލޫމާތުދެއެެވެ.

އެމްޓީސީސީން ބުނި ގޮތުގައި، ރޭގަނޑާއި ދުވާލު ދާއޮހޮރުވައިގެން ބުރަކޮށް މަސައްކަތްކުރާ އިޚްލާޞްތެރި މުވައްޒަފުންގެ މަސައްކަތުގެ އަގުވަޒަންކުރުމަކީ ކުންފުނީގެ މެނޭޖްމަންޓްގެ އަބަދުވެސް އެންމެ ބޮޑު އަމާޒެވެ. އެހެންކަމުން، ބޯހިޔާވަހިކަމަކަށް އުންމީދުކޮށްގެން އެތައް އަހަރެއް ވަންދެން މާޔޫސްވެފައި ތިބި މުވައްޒަފުންނަށް މިއީ ލިބޭނެ ވަރަށް އުފާވެރި ޚަބަރެއް ކަމަށް އެ ކުންފުނިން ދެކެއެވެ. އެމްޓީސީސީގެ މިއަދުގެ މެނޭޖްމަންޓްގެ އަމާޒަކީ ބިން ހަމަޖެހުމާއެކު ވީހާވެސް އަވަހަކަށް މި މަޝްރޫޢުގެ އަމަލީ މަސައްކަތްތައް ފެށޭނެ އިންތިޒާމު ހަމަޖެއްސުމެވެ.

އަދި ކުންފުނީގެ މުވައްޒަފުންގެ ހެވާއި ލާބައަށް މަސައްކަތް ކުރުންމަތީ އަބަދުވެސް ދެމިތިބޭނެކަމުގެ ޔަޤީންކަން އެ ކުންފުނިން ވަނީ މުވައްޒަފުންނަށް އަރުވާފައެވެ.