ޤައުމީ މަޞްލަޙަތު ކުރިއަށް ނެރެ، މުހާޖިރުންގެ ލާމަސީލު އެއްބައިވަންތަކަން ދިރުވަންޖެހޭ: ރައީސް

ހިޖުރީ އާ އަހަރު ފެށުމުގެ މުނާސަބަތުގައި ރައީސް ނެރުއްވި ހިތޯބުގައި އެމަނިކުފާނު ފާހަގަކުރެއްވި ގޮތުގައި، މީގެ އަހަރުތަކެއް ކުރިން މަދީނާގެ އަންޞާރީންނާއި މުހާޖިރުން ދެއްކެވި ފަދަ ލާމަސީލު އެކުވެރިކަމާއި، އޯގާތެރިކަމާއި، އެކަކު އަނެކަކަށް އެހީތެރިވުމުގެ މަތިވެރި ރޫޙު މިއަދު އަޅުގަނޑުމެންގެ މި ކުޑަކުޑަ ދިވެހި މުޖުތަމަޢުގައި ދިރުވަން އެބަޖެހެއެވެ. އަދި ސިޔާސީ ގޮތުންނާއި އިޖުތިމާޢީ ގޮތުން އުފެދޭ ޚިޔާލުތަފާތުވުންތަކާއި ބައިބައިވުންތައް އެއްކިބާކޮށް، ޤައުމީ މަޞްލަޙަތު ހުރިހާ ކަމަކަށްވުރެ ކުރިއަށް ނެރުމަކީ މިއަދު މި ބަރަކާތްތެރި މުނާސަބަތުން އަޅުގަނޑުމެން ހާސިލުކުރަންވީ އެންމެ މުހިންމު ފިލާވަޅުކަން ފާހަގަކުރައްވަމުން ރައީސް ވިދާޅުވީ، ޤައުމެއް ބިނާކޮށް އާރާސްތު ކުރެވޭނީ އެންމެންގެ ހިތްތައް ސާފުވެ، އެއް އަމާޒަކަށް ދިޔުމަށް އެންމެން އެކުގައި އަތުގުޅާލައިގެން މަސައްކަތް ކޮށްގެން ކަމަށެވެ.

ރައީސް ވިދާޅުވީ، ދުނިޔެއަށް ކުރިމަތިވަމުންދާ ގޮންޖެހުންތަކުން އަރައިގަނެވޭނީ އާ އީޖާދުތަކާއެކު ހީވާގިކަމާއި މުރާލިކަމާއެކު މަސައްކަތް ކޮށްގެން ކަމަށެވެ. އެހެންކަމުން، އިސްލާމީ އުސޫލުތަކާއި ދިވެހިވަންތަ ސަގާފަތް ދަމަހައްޓައި، ހުރިހާ ރައްޔިތުން އެކުއެކީގައި މަސައްކަތް ކުރެއްވުމަށް އެމަނިކުފާނު އެދިވަޑައިގަތެވެ. މީގެއިތުރުން، ދުނިޔޭގެ އެކި ކަންކޮޅުތަކުގައި، ޚާއްޞަކޮށް ފަލަސްޠީނުގެ ބިމުގައި އަނިޔާ ލިބެމުންދާ މުސްލިމް އަޚުންނާއި އުޚުތުންނަށް ހެޔޮދުޢާ ކުރުމުގައި ދެމިތިއްބެވުމަށްވެސް ރައީސް މުޢިއްޒު ހަނދާންކޮށްދެއްވިއެވެ.