މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ބުލަޑް ޑޮނޭޝަން ކޭންޕު ފަށައިފި އެވެ.
އެމްއޭސީއެލް އާއި މޯލްޑިވިއަން ބްލަޑް ޑޮނޭޝަން ސާވިސަސް (އެމްބީއެސް) އާ ގުޅިގެން ކުރިއަށް ގެންދާ މި ހަރަކާތް މިއަދާއި މާދަމާ ވެސް ކުރިއަށްގެންދާނެ އެވެ.
ފުރަތަމަ ދުވަހުގެ ހަރަކާތްތައް މިއަދު ހަވީރު 4 އާ ހަމަޔަށް ކުރިއަށް ގެންގޮސްފައިވާއިރު، މާދަމާވެސް މިހަރަކާތް ހަވީރު ހަތަރަކާ ހަމަޔަށް ކުރިއަށްދާނެ އެވެ. އެމްއޭސީއެލް އިން ވަނީ މިހަރަކާތުގައި ގިނަ އަދަދެއްގެ މުވައްޒަފުން ބައިވެރިވެފައިވާކަން ފާހަގަކޮށްފަ އެވެ.
މިއީ ކޮންމެ އަހަރަކު ވެސް އެމްއޭސީއެލްގެ މުވައްޒަފުންނަށް އަމާޒުކޮށް އެ ކުންފުނިން ހިންގާ ހަރަކާތެކެވެ.
އެކަމަކު އެހެން އަހަރުތަކާ ހިލާފަށް މި އަހަރު މި ކޭމްޕް ކުރިއަށް ގެންދަނީ ވެލާނާ އިންޓަނޭޝަނަލް އެއާޕޯޓު (ވީއައިއޭ) ގައި މަސައްކަތްކުރާ ދައުލަތުގެ އިދާރާތަކާއި މުއައްސަސާތަކާއި ކުންފުނިތަކުގެ އިތުރުން ރިސޯޓް މުވައްޒަފުންނަށް ވެސް ހުޅުވާލައިގެން ނެވެ. އެގޮތަށް ބަދަލުކުރުމުގެ މަގުސަދަކީ ލޭ ލިބުން ދަތިވެ, އެމްބީއެސް އިން އާންމުންގެ އެހީތެރިކަމަށް އެދިފައިވާތީ އާއި ކޮންމެ އަހަރެއްގެވެސް ރޯދަ މަހު ލޭ ލިބުން ދަތިވާތީ އެކަމަށް އެހީތެރިވުން ކަމަށް އެމްއޭސީއެލުން ބުނެފައިވެ އެވެ.
