މި އަހަރު ބޭއްވުމަށް ހަމަޖެހިފައިވާ “މޯލްޑިވްސް މެރިޓައިމް ކޮންފަރެންސް” ގެ އިތުރު ކޮންފަރެންސް ޕާޓްނަރުންނާއެކު މޯލްޑިވްސް ޕޯޓްސް ލިމިޓަޑް (އެމްޕީއެލް) އިން އެއްބަސްވުމެއްގައި ސޮއިކޮށްފި އެވެ.
އެމްޕީއެލުން ވަނީ ހާއްސަ ރަސްމިއްޔާތަކާއެކު “މޯލްޑިވްސް މެރިޓައިމް ކޮންފަރެންސް”ގެ ހަތަރު ޕާޓްނަރުންނާއެކު އެއްބަސްވުމެއްގައި ސޮއިކޮށްފައެވެ. އެއީ ލޮޖިސްޓިކްސް ޕާޓްނަރަކަށް މޯލްޑިވްސް ސްޓޭޓް ޝިޕިން (އެމްއެސްއެސް)، ބްރޯޑްކާސްޓިން ޕާޓްނަރަކަށް ޕަބްލިކް ސަރވިސް މީޑިއާ (ޕީއެސްއެމް)، ހޯސްޓިން ޕާޓްނަރަކަށް ވިލާ ޝިޕިންގ އެންޑް ޓްރޭޑިންގ ކޮމްޕެނީ އަދި މެގަޒިން ޕާޓްނަރަކަށް މޯލްޑިވްސް މެރިޓައިމް ޖާރނަލް (އެމް.އެމް.ޖޭ) އެވެ
މި ރަސްމިއްޔާތުގައި އެމް.ޕީ.އެލްގެ ފަރާތުން ސޮއިކުރެއްވީ ކުންފުނީގެ ސީ.އީ.އޯ މުހައްމަދު ރިޝްވާނެވެ. ލޮޖިސްޓިކްސް ޕާޓްނަރު، އެމް.އެސް.އެސްގެ ފަރާތުން އެއްބަސްވުމުގައި ސޮއިކުރެއްވީ މެނޭޖިންގ ޑިރެކްޓަރ އަހްމަދު ޝަރީފެވެ. ބްރޯޑްކާސްޓިންގ ޕާޓްނަރު، ޕީ.އެސް.އެމްގެ ފަރާތުން އެއްބަސްވުމުގައި ސޮއިކުރެއްވީ އެމްޑީ އަހްމަދު ޝަކީބެވެ. ހޯސްޓިންގ ޕާޓްނަރު، ވިލާ ޝިޕިންގ އެންޑް ޓްރޭޑިން އެންޑް ޓްރޭޑިންގ ކޮމްޕެނީގެ ފަރާތުން ސީއީއޯ މުއާވިޔަތު އުމަރު ސޮއިކުރެއްވިއިރު، މެގަޒިން ޕާޓްނަރު އެމް.އެމް.ޖޭގެ ފަރާތުން ސޮއިކުރެއްވީ ކެޕްޓަން މުހައްމަދު ނާޒިމެވެ.
އެމްއޭސީއެލުން ބުނިގޮތުގައި މި އަހަރުގެ “މޯލްޑިވްސް މެރިޓައިމް ކޮންފަރެންސް” ބޭއްވުމަށް ހަމަޖެހިފައިވަނީ މި އަހަރުގެ އޭޕްރީލް މަހުގެ 15 ވަނަ ދުވަހުއެވެ. މިއީ “މޯލްޑިވްސް މެރިޓައިމް ކޮންފަރެންސް”ގެ ދެވަނަ އެޑިޝަންކަމަށާއި، މި ކޮންފަރެންސް އެންމެ ފުރަތަމަ އެމް.ޕީ.އެލްއިން ބޭއްވީ 2024 ވަަނަ އަހުކަމަށް އެކުންފުނިން ބުނެފައިވެއެވެ. މި ކޮންފަރެންސަކީ މެރިޓައިމް ދާއިރާގެ ބައިނަލްއަގްވާމީ ތަޖުރިބާކާރުންނާއި ސްޓޭކްހޯލްޑަރުންނާއި ދާއިރާއާ ގުޅުންހުރި ފަރާތްތައް ބައްދަލުކޮށް، ދާއިރާގެ ކުރިއެރުމާއި ގުޅޭ ގޮތުން މަޝްވަރާކޮށް ހިޔާލު ބަދަލުކުރުމުގެ ގޮތުން ބާއްވާ ބައިނަލްއަގްވާމީ ކޮންފަރެންސެއް ކަމަށް އެކުންފުނިން ބުނެފައިވެއެވެ.
މީގެ އިތުރުން މި ކޮންފަރެންސްގެ ޕާޓްނަރުންގެ ގޮތުގައި މޯލްޑިވްސް ކޯސްޓް ގާޑް، މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން، ޔުނައިޓަޑް ނޭޝަންސް ކޮންފަރެންސް އޮން ޓްރޭޑް އެންޑް ޑިވަލޮޕްމަންޓް (އަންކްޓަޑް)، އިންޓަރނޭޝަނަލް އެސޯސިއޭޝަން އޮފް ޕޯޓްސް އެންޑް ހާބަސް، ސެކިއުރިޓީ އެންޑް ސޭފްޓީ ޕާޓްނަރުގެ ގޮތުގައި މޯލްޑިވްސް ޕޮލިސް ސާވިސަސް އަދި އެކެޑަމިކް ޕާޓްނަރުގެ ގޮތުގައި މޯލްޑިވްސް ނޭޝަނަލް ޔުނިވާރްސިޓީ ވަނީ މީގެ ކުރިން ހަމަޖައްސާފައިކަމަށް އެމްއޭސީއެލުން ބުނެފައިވެއެވެ.
