ނ. ވިހަފަރު އެއާޕޯޓަށް ބޭނުންވާ ބިން ހިއްކުމުގެ އަމަލީ މަސައްކަތް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)އިން ފަށައިފި އެވެ.
އެ މަޝްރޫއުގެ އަމަލީ މަސައްކަތް ފެށުމަށް ބޭއްވި ރަސްމިއްޔާތު ޝަރަފުވެރިކޮށްދެއްވާފައި ވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ. އަަދި މަޝްރޫއު ފައްޓަވައިދެއްވީ އެމްއޭސީއެލްގެސީއޯއޯ އަދި މެނޭޖިން ޑިރެކްޓަރު އިބްރާހިމް ޝަރީފް މުހައްމަދު އާއި އިކޮނޮމިކް މިނިސްޓަރު މުހައްމަދު ސައީދެވެ.
އެމްއޭސީއެލުން ބުނިގޮތުގައި މި މަޝްރޫއު ކުރިއަށް ގެންދަނީ ދެ ފިޔަވައްސަކަށް ބަހާލައިގެންނެވެ. އެގޮތުން، ފުރަތަމަ ފިޔަވަހީގައި ކުރިއަށްދާނީ އެއާޕޯޓަށް ބޭނުންވާ ބިން ހިއްކުމާއި ހިއްކާ ބިން ހިމާޔަތްކުރުމުގެ މަސައްކަތެވެ. މި ފިޔަވަހީގެ ދަށުން ވިހަފަރުގެ 42 ހެކްޓަރު ހިއްކުމަށް ހަނަޖެހިފައިވާއިރު، ހިއްކާ ބިން ހިމާޔަތްކުރުމަށް 4,267 މީޓަރުގެ ރިވެޓްމަންޓް ޖަހާނެކަމަށް އެމްއޭސީއެލުން ވަނީ ބުނެފައެވެ. އަދި އެމަޝްރޫއުގެ ދެވަނަ ފިޔަވަހީގައި ހިމެނެނީ 1,500 މީޓަރުގެ ރަންވޭއަކާއެކު އެއަރޕޯޓެއް ތަރައްގީކުރާނެ އެވެ.
ވިހަފަރުގައި އެއާޕޯޓެއް ތަރައްގީކުރުމަށް ރައީސުލްޖުމްހޫރިއްޔާގެ ގަރާރަކުން ކަނޑައަޅުއްވައި އިއުލާންކުރެއްވީ 2024 ވަނަ އަހަރުގެ މާޗް މަހުގައެވެ. އަދި 2025 ވަނަ އަހަރުގެ ޖުލައި މަހުގެ ތެރޭގައި, ނ. އަތޮޅުގެ ރައްޔިތުންނާ ބައްދަލުކުރައްވައި ރައީސުލްޖުމްހޫރިއްޔާ ވަނީ މި އަހަރުގެ ކުރީކޮޅު, އެއާޕޯޓުގެ އަމަލީ މަސައްކަތް ފެށޭނެކަމުގެ ޔަގީންކަންދެއްވާފަ އެވެ.
