ގިރާވަރުފަޅުން ނުހިއްކާ އޮތް ބައި ހިއްކުމުގެ އަމަލީ މަސައްކަތް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ފަށައިފި އެވެ.
މާލޭ ރައްޔިތުންނަށް ގޯތި ދޫކޮށްފައިވާ ގިރާވަރުފަޅުން ޖުމުލަ 167.15 ހެކްޓަރު ހިއްކުމަށް ހަމަޖެހިފައިވާއިރު, އެމްއޭސީއެލުން މިހާރު ހިއްކަން ފެށީ ގިރާވަރުފަޅުން ނުހިއްކާ އޮތް 97.15 ހެކްޓަރެވެ.
އެކުންފުނިން އިތުރަށް ބުނިގޮތުގައި މި މަސައްކަތް ކުރަމުންދާނީ 22,000 ސީބީއެމްގެ “އޮރެންޖް” ނަމަކަށް ކިޔާ ޑްރެޖަރަކުންނެވެ. މި ޑްރެޖަރުގެ ދިގުމިނުގައި201 މީޓަރު ހުރެއެވެ.
ގިރާވަރުފަޅު ހިއްކުމުގެ މަސައްކަތްތަކީ މާލޭގައި ދިރިއުޅޭ ފަރާތްތަކަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލެއް ގެނައުމަށްޓަކައި ފަށާފައިވާ މަޝްރޫއެކެވެ. އެގޮތުން މިބިމުން4000 އަށް ވުރެ ގިނަ ގޯތި ދިނުމަށް ސަރުކާރުން ވަނީ ކަނޑައަޅާފައެވެ.
ގިރާވަރުފަޅުން ދޫކުރާ ގޯތީގެ ތަފްސީލް:
- 1250 އަކަފޫޓުގެ 2603 ގޯތި
- 1650 އަކަފޫޓުގެ 1214 ގޯތި
- 2050 އަކަފޫޓޫގެ 254 ގޯތި
- 2450 އަކަފޫޓުގެ 1 ގޯތި
މި ސްކީމާ ގުޅިގެން، ކުރިން ޝާއިއުކުރެވުނު ޕްލޭންގައި 610 ގޯތި މަދުވާތީ، އެ އަދަދު ހިމަނައިގެން ގިރާވަރުފަޅުން ދޫކުރަންޖެހޭ ޖުމްލަ 4,072 ގޯތި ހިމެނޭހެން އައު ލޭންޑް ޔޫސް ޕްލޭންއެއް ހައުސިން މިނިސްޓްރީން ވަނީ އެކުލަވާލާފައެވެ. އެހެންވެ މި ބަދަލާ ގުލިގެން “ބިންވެރިޔާ” ސްކީމްގެ ދަށުން ގިރާވަރުފަޅުން ގޯތި ލިބިފައިވާ ފަރާތްތަކަށް، ކަނޑައެޅިފައިވާ ބިމުގެ ސަރަހައްދުތަކަށް ބަދަލު އަންނާނެތީ، އައު ލޮޓް ނަންބަރުތައް ކަނޑައެޅުމަށްޓަކައި އަލުން ގުރުނެގުމަށް މިނިސްޓްރީން ވަނީ ނިއްމާފަ އެވެ. މި ގުރުއަތުލުން، މިއަދު ހެދުނު9:30 އިން ފެށިގެން ސޯޝަލްސެންޓަރު ހޯލުގައި ކުރިއަށްދެއެވެ.
