މިދިޔަ އަހަރުގެ ޒަކާތު ފަންޑުން ފަގީރުންނާއި މިސްކީނުންގެ ބޭސްފަރުވާއަށް މިދިޔަ އަހަރުގެ ނޮވެމްބަރުގައި 1.5 މިލިއަނަށް ވުރެ ގިނަ ފައިސާ ހަރަދުކޮށްފައިވާ ކަމަށް ޒަކާތް ހައުސިންގެ ތަފާސްހިސާބުތަކުން ދައްކައިފިއެވެ.
ޒަކާތު ހައުސިނުން ނެރުނު ތަފާސްހިސާބުތަކުން ދައްކާގޮތުގައި މިދިޔަ އަހަރުގެ ނޮވެންބަރު މަހުގައި ފަގީރުންނާއި މިސްކީނުންގެ ބޭސްފަރުވާއަށް 1،513،656.86 ރުފިޔާ ޒަކާތު ފަންޑުން ހަރަދުކޮށްފައިވާ ކަމަށެވެ. ނަމަވެސް، ފަގީރުންނާއި މިސްކީނުންގެ ބޭސްފަރުވާއަށް ކަނޑައަޅާފައި ވަނީ 1.4 މިލިއަން ރުފިޔާކަން މި ތަފާސްހިސާބުތަކުން ދައްކައެވެ. ފަރުވާއަށް އެހީދީފައިވާ ބަލިތަކަށް ބަލާއިރު، ކެންސަރު ބަލި، ހިތުގެ ބަލި، ޓްރާންސްޕުލާންޓް، ސިކުޑީގެ ބަލި، ފުއްޕާމޭގެ ބަލި، ކިޑްނީގެ ބަލި ހިމެނެއެވެ.
ފަގީރުންނާއި މިސްކީނުންގެ ޒަރޫރީ ބޭނުންތަކަށް 53،000 ޒަކާތުފަންޑުން ކަނޑައަޅާފައިވެއެވެ. ނަމަވެސް، ހަރަދުވެފައި ވަނީ 84،000 އަށް ވުރެ ގިނަ ރުފިޔާއެވެ. ޒަކާތު ފަންޑުން ބޯންމެރޯ ހެދުމަށް ވެސް 212،000 ރުފިޔާ ދޫކޮށްފައިވެއެވެ.
އެއިދާރާގެ މުއައްޒަފުންނަށް މުސާރަ ދިނުމަށްތަކައި 248،000 ހަރަދުކޮށްފައިވާއިރު، މުއައްޒަފުންނަށް ތަމްރީނު ދިނުމަށްޓަކައި 81،000 އަށް ވުރެ ގިނަ ރުފިޔާ ހަރަދުކޮށްފައިވެއެވެ. އަދި ރާއްޖެއާއި ރާއްޖެއިން ބޭރުގައި ވަނިކޮށް ހާލުގައި ޖެހިފައިވާ ފަރާތްތަކަށް 69،000 ރުފިޔާ ހަރަދުކޮށްފައިވާ ކަމަށް މިތަފާސްހިސާބުތަކުން ދައްކައެވެ.
ޒަކާތުފަންޑުން ފީސަބީލިﷲ އަށް ކޮށްފައިވާ ހަރަދުތައް:
- ގުރުއާން ހިތުދަސްކުރުމާއި ގުރުއާނުގެ އިލްމުފެތުރުމަށް- 1،034،871،11 ރ
- މަތީތައުލީމް ފުރިހަމަ ކުރުމަށް- 100،398.93 ރ
- ދީނީ އެކިއެކި ޕްރޮގުރާމްތައް ހިންގުމަށް- 353،218.23ރ
