ބިދޭސިން މަސައްކަތް ކުރާ ސައިޓްތަކުގެ ހުއްދަ އާކުރަން ދީފައިވާ މުއްދަތު، މިނިސްޓަރީ އޮފް ހޯމްލޭންޑް ސެކުރިޓީން އިތުރުކޮށްދީފި އެވެ.
ކޯޓާ ދޫކުރާ މަސައްކަތްތަކަށް ސައިޓް ރަޖިސްޓްރީ ކުރުމަށް މިހާރު ހުށައަޅަންޖެހޭ ލިޔެކިޔުންތަކުގެ އިތުރުން ނޯޓަރައިޒް ކޮށްފައިވާ “ވާރކް ސައިޓް ޑިކްލަރޭޝަން ފޯމް” އަދި އިގްރާރް ހުށައަޅަންޖެހެ އެވެ. މިކަމާގުޅިގެން ދީފައިވާ މުއްދަތު އިތުރުކޮށްދިނުމަށް ގިނަ ވަޒީފާދޭ ފަރާތްތަކުން އެދެމުންދާ ކަމަށް ހޯމް މިނިސްޓަރީން ނެރުނު ބަޔާނުގައި ބުނެފައިވެ އެވެ. އެހެންވެ، މިތަކެތި ހުށައަޅަންޖެހޭ މުއްދަތު މިއަހަރުގެ 1 ޖޫންއާ ހަމައަށް އިތުރުކޮށްދީފައިވާ ކަމަށް އެ ވުޒާރާއިން ބުނެފައިވެ އެވެ.
ކުރިން ރަޖިސްޓަރީ ކޮށްފައިވާ ވޯކް ސައިޓްތަކުގެ ތެރެއިން، ކޯޓާއެއް ނުނަގައި 1 އަހަރު، ދުވަހަށްވުރެ އިތުރު ވެފައިވާ ވޯކް ސައިޓްތައް މި މަހުގެ 25 ވަނަ ދުވަހުން ފެށިގެން ‘އިން-އެކްޓިވް’ ސެޓޭޓަސް އަށް އެކްސްޕެޓް ސިސްޓަމް، މެދުވެރިކޮށް ބަދަލުކުރެވޭނެ ކަމަށް އެވުޒާރާއިން ބުނެފައިވެއެވެ.
އެ ވުޒާރާއިން ވަނީ 1 ޖޫންގެ ކުރިން ހުށައަޅަންޖެހޭ ހުރިހާ ލިޔެކިޔުންތަކެއް “ޑޮކިއުމެންޓް އަޕްޑޭޓް ރިކުއެސްޓް” ނުވަތަ “ސައިޓް ޑިކްލަރޭޝަން އަޕްޑޭޓް” މެދުވެރިކޮށް ހުށައެޅުމަށް އެދިފައެވެ. އަދި ކަނޑައެޅިފައިވާ މުއްދަތުގެ ތެރޭގައި ފޯމް ހުށަނާޅާ ފަރާތްތަކުގެ ސައިޓްތައް ސަސްޕެންޑް ކުރެވޭނެ ކަމަށް ވެސް ބުނެފައިވެއެވެ.
ވަޒީފާދޭ ފަރާތްތަކަށް ފަސޭހަ ކޮށްދިނުމަށްޓަކައި ފޯމު ފުރުމުގައި އާންމުކޮށް އަންނާނެ ސުވާލުތަކާއި ޖަވާބުތައް އެކްސްޕެޓް ސިސްޓަމް ހޯމްޕޭޖުން ލިބޭނެ ކަމަށް އެ ވުޒާރާއިން ބުނެފައިވެއެވެ.
