ރައީސުލްޖުމްހޫރިއްޔާ ރާއްޖޭގެ ފުރަތަމަ ސަސްޓެއިނަބަލް ޓައުންޝިޕް މަޝްރޫއު ”ޕްރޮޖެކްޓް އައިލާ” ގެ ބިންގާ އަޅުއްވައިދެއްވައިފި އެވެ.
ޓައުންޝިޕް މަޝްރޫއަކީ ނ. އަތޮޅުގެ ދެކެނަންފަރާއި ދިގުފަރުގެ އިތުރުން ކުރަމާދޫ ގައި ކުރިއަށްގެންދާ 790 މިލިއަން އެމެރިކާ ޑޮލަރުގެ ބޮޑު މަޝްރޫއެެކެވެ. އައިލާ ސަސްޓެއިނަބަލް ޓައުންޝިޕް ތަރައްގީކުރުމަށްޓަކައި، ދިވެހި ސަރުކާރާއި ކުރިސްޓަލް ހޯލްޑިންގްސް ޕްރައިވެޓް ލިމިޓެޑާ ދެމެދު އިންވެސްޓްމަންޓް އެއްބަސްވުމެއްގައި ސޮއިކުރައްވައި “ޕްރޮޖެކްޓް އައިލާ” ސްޕެޝަލް އިކޮނޮމިކް ޒޯނެއްގެ ގޮތުގައި ރައީސުލްޖުމްހޫރިއްޔާ ޑރ މުހައްމަދު މުއިއްޒު ކަނޑައެޅުއްވީ މިދިޔަ އަހަރު ޑިސެންބަރު މަހުގެ 31 ވަނަ ދުވަހު ގައެވެ.
މި މަޝްރުއުގެ ބިންގާ އެޅުމުގެ ރަސްމިއްޔާތުގައި ރައީސުލްޖުމްހޫރިއްޔާގެ އަރިހުގައި އިކޮނޮމިކް މިނިސްޓަރު، ހައުސިން މިނިސްޓަރު އަދި ޕްރޮޖެކްޓް އައިލާ، ކްރިސްޓަލް ހޯލްޑިންގްސް އަދި ބްލޫރޮކްގެ މަންދޫބުން ބައިވެރިވެވަޑައިގަންނަވާފައިވެ އެވެ.
މިއަދުގެ ރަސްމިއްޔާތުގައި ވާހަކަފުޅު ދައްކަވަމުން، އިކޮނޮމިކް މިނިސްޓަރު މުހައްމަދު ސައީދު ވަނީ އިގްތިސާދު ސިންދަފާތުކުރުމަށް އެސް.އީ.ޒެޑް އޮނިގަނޑުގެ މުހިންމުކަން ފާހަގަކުރައްވާފައެވެ. އެގޮތުން އައިލާ ފަދަ މަޝްރޫއުތަކުގެ ސަބަބުން ޗުއްޓީ ހޭދަކުރާ މަންޒިލެއްގެ އިތުރުން އިންވެސްޓްކޮށް ދިރިއުޅެވޭނެ އަދި ދިގުމުއްދަތަކަށް ފައިދާ އިތުރުކުރެވިދާނެ ތަނަކަށް ރާއްޖެ ހެދިދާނެ ކަމަށް މިނިސްޓަރު ވިދާޅުވެފައިވެއެވެ.
2028 ވަނަ އަހަރު ނިމުމުގެ ކުރިން ސަސްޓެއިނަބަލް ޓައުންޝިޕް އޮޕަރޭޝަނަށް ގެނައުމަށް އަމާޒު ހިފާފައިވާއިރު، ލަގްޒަރީ ވިލާ އަދި އަލްޓްރާ ލަގްޒަރީ ޓޫރިސްޓް ރިޒޯޓަކާއި މެރީނާއެއް އެތަނުގައި ގާއިމްކުރުމަށް ވަނީ ނިއްމާފައެވެ. އަދި ބައިނަލްއަގުވާމީ ފެންވަރުގެ ސިއްހީ ހިދުމަތްދޭ މަރުކަޒަކާއި ބައިނަލްއަގުވާމީ ފެންވަރުގެ ހޮސްޕިޓަލިޓީ ތަމްރީނުދޭ މަރުކަޒެއްވެސް އެތަނުގައި ގާއިމް ކުރުމަށް ނިއްމާފައިވެއެވެ. ދެމެހެއްޓެނިވި އަދި ޒަމާނީ ދަނޑުވެރިކަމުގެ ވަސީލަތްތަކާއި، އެކުއަކަލްޗަރުގެ ވަސީލަތްތަކާއެކު ތަރައްގީކުރެވޭ މިޓައުންޝިޕްގައި ބޭނުންކުރާ ހަކަތައަކީ މަދުވެގެން 60 ޕަސެންޓް އިއާދަކުރަނިވި ހަކަތަ ކަމުގައި ހެދުމަށް ވެސް ވަނީ ހަމަޖެހިފައެވެ.
