“ބިންވެރިޔާ” ސްކީމްގެ ދަށުން ގިރާވަރުފަޅުން ގޯތިލިބޭ ފަރާތްތަކުގެ އައު ލޮޓް ނަންބަރުތައް ކަނޑައެޅުމަށްޓަކައި އަލުން ގުރުނަގަން ހަމަޖެހިފައިވާ ކަމަށް ހައުސިން މިނިސްޓްރީން އަންގައިފި އެވެ.
ކުރީގެ ޝާއިއުކުރެވުނު ޕްލޭންގައި 610 ގޯތި މަދުވާތީ، އެ އަދަދު ހިމަނައިގެން ގިރާވަރުފަޅުން ދޫކުރަންޖެހޭ ޖުމްލަ 4,072 ގޯތި ހިމެނޭހެން އައު ލޭންޑް ޔޫސް ޕްލޭން އެކުލަވާލާފައިވާ ކަމަށް މިމަހުގެ 26 ވަނަ ދުވަހު ހައުސިން މިނިސްޓްރީން ވަނީ ގެޒެޓަގައި ހާމަކޮށްފަ އެވެ. އެހެންވެ މި ބަދަލާ ގުލިގެން “ބިންވެރިޔާ” ސްކީމްގެ ދަށުން ގިރާވަރުފަޅުން ގޯތި ލިބިފައިވާ ފަރާތްތަކަށް، ކަނޑައެޅިފައިވާ ބިމުގެ ސަރަހައްދުތަކަށް ބަދަލު އަންނާނެތީ، އައު ލޮޓް ނަންބަރުތައް ކަނޑައެޅުމަށްޓަކައި އަލުން ގުރުނެގުމަށް މިނިސްޓްރީން ވަނީ ނިއްމާފަ އެވެ.
އެގޮތުން، ގުރުނެގުމަށް މިނިސްޓަރީން ނިއްމާފައި ވަނީ 31 ޖަނައަރީވާ ހޮނިހިރު ދުވަހުގެ ހެނދުނު 9:30 ގައެވެ. އަދި ގުރުއަތުލުން އޮންނާނީ ސޯޝަލް ސެންޓަރުގެ ހޯލުގަ އެވެ.
ގިރާވަރުފަޅުން ދޫކުރާ ގޯތީގެ އަދަދާއި ބޮޑުމިނުގެ ތަފްސީލު:
- 1250 އަކަފޫޓުގެ 2603 ގޯތި
- 1650 އަކަފޫޓުގެ 1214 ގޯތި
- 2050 އަކަފޫޓުގެ 254 ގޯތި
- 2450 އަކަފޫޓުގެ 01 ގޯތި
މިނިސްޓްރީން ބުނިގޮތުގައި ގިރާވަރުފަޅުން ބިން ލިބޭ ފަރާތްތަކުގެ ތެރެއިން ގުރުއަތުލާ ހޯލަށް ބިން ލިބިފައިވާ ފަރާތްތަކުގެ ތެރެއިން ކޮންމެ ގޯއްޗަކަށް ވަދެވޭނީ އެއް މީހަކަށް ކަމަށެވެ. އަދި ގޯތި ލިބޭ ފަރާތެއްގެ ބަދަލުގައި އެހެން ފަރާތަކުން ގުރުނަގަންދާ ނަމަ އެކަން އަންގައިދޭ ލިޔުމާއި އަދި ގޯތީގެ ވެރިފަރާތުގެ އައިޑީ ކާޑުގެ ކޮޕީގެ އިތުރުން ބަދަލުގައި ހާޒިރުވާ ފަރާތުގެ އައިޑީ ކާޑުގެ ކޮޕީއެއް ގެންދިއުމުން ގުރުއަތު ނަގަން ހަމަޖެހިފައިވާ ސަރަަހައްދަށް ވަދެވޭނެ އެވެ.
ގުރުއަތުނެގުން ކުރިއަށްދާއިރު ގޯތި ލިބިފައިވާ ފަރާތަށް ހަމަޖެހިގެންދާ ޕްލޮޓް ހިޔާވަހި ޕޯޓަލްއިން ފެންނާނެ ކަމަށާއި އެފަރާތަކަށް ލިބޭ ފްލޮޓް ނަންބަރު އެސް.އެމް.އެސްގެ ޒަރިއްޔާއިން އެންގޭނެ ކަން މިނިސްޓްރީން ބުނެފައިވެއެވެ. އަދި ގޯތި ލިބޭ ފަރާތްތަކުގެ ގުރުނަގާ ނިމުމުން، ގޯތި ހަވާލުކުރުމުގެ އެއްބަސްވުމުގެ ސޮއިކުރުމާއި ގޯތީގެ ރަޖިސްޓަރީ ހަވާލުކުރުމުގެ މަސައްކަތް ކުރިއަށްގެންދާނެ ގޮތުގެ މައުލޫމާތު ފަހުގެ ތާރީހެއްގައި ހިއްސާކުރާނެކަމަށް މިނިސްޓްރީން ބުނެފައިވެ އެވެ.
