ސަރުކާރުން ބޭންކް އޮފް މޯލްޑިވްސް (ބީއެމްއެލް)އާ ހަވާލުކޮށްގެން ހުޅުމާލޭގައި ކުރިއަށްގެންދާ އެފޯޑަބަލް ހައުސިންގް މަޝްރޫއުތަކުގެ އަމަލީ މަސައްކަތް ފަށައިފިއެވެ.
މޯލްޑިވްސް މަނިޓަރީ އޮތޯރިޓީ(އެމްއެމްއޭ)އިން އެކުލަވާލާފައިވާ އިންކްލޫސިވް ނޭޝަނަލް އެފޯޑަބަލް ހައުސިން (އައިއެންއޭއެޗް) ދަށުން ބޭންކް އޮފް މޯލްޑިވްސްއިން އުފެއްދި ސަބްސިޑިއަރީ ކުންފުންނި ކަމަށްވާ ބީއެމްއެލް އެފޯޑަބަލް ހޯމް ލީސިންގ ކޮމްޕެނީ ޕްރައިވެޓް ލިމިޓެޑްއިން، ހުޅުމާލޭގައި އަލަށް އިމާރާތްކުރާ އެފޯޑަބަލް ހައުސިންގ ޔުނިޓްތަކުގެ އިމާރާތްކުރުމުގެ 5 މަޝްރޫއެއް ވަނީ އަމިއްލަ ކުންފުނިތަކާ ހަވާލުކޮށްފަ އެވެ.
މި ޕުރޮޖެކްޓްތައް އެޅުމުގެ އަމަލީ މަސައްކަތް ފެށި އިއްޔެ އެވެ. މި މަސައްކަތްތައް ފައްޓަވައި ދެއްވީ ހައުސިން މިނިސްޓަރު ޑރ. އަބްދުﷲ މުއްތަލިބާއި ބީއެމްއެލްގެ ޗެއާޕާސަން އަހުމަދު އަލީ ހަބީބާއި ބީއެމްއެލްގެ ސީއީއޯ އަދި މެނޭޖިން ޑިރެކްޓަރު، މުހައްމަދު ޝަރީފް ބައިވެރިވެވަޑައިގަނެފައިވެ އެވެ.
މި މަޝްރޫއުގެ މަސައްކަތްތައް ހަވާލުކޮށްފައިވަނީ އަމިއްލަ ކުންފުންޏަކާ އެވެ. އެގޮތުން ބެއިޖިން އާބަން ކޮންސްޓްރަކްޝަން ގްރޫޕް (ބީޔޫސީޖީ) އަދި ޗައިނާ މެޝިނަރީ އިންޖީނިއަރިންގ ކޯޕަރޭޝަން (ސީއެމްއީސީ) އާ ހަވާލުކޮށްގެން ހުޅުމާލޭ ޒޯން 2ގެ ޖުމްލަ 13،475 އަކަފޫޓުގެ ސަރަހައްދެއްގެ ހަތަރު ބިމެއްގައި 1،117 ހައުސިން ޔުނިޓު ތަރައްގީކުރާނެ އެވެ. 1،224 އެފޯޑަބަލް ހައުސިން ޔުނިޓް ތަރައްގީ ކުރުމަށް ސީއެމްއީސީއާ ހަވާލުކޮށްފައިވާއިރު، އަމިން ކޮންސްޓްރަކްޝަން، އެފް.ޑަބްލިއު ކޮންސްޓްރަކްޝަންގެ އިތުރުން ރަޝީދް ކާޕެންޓްރީ ކޮންސްޓްރަކްޝަން (އާރސީސީ) އަށް ވެސް ވަނީ ޕުރޮޖެކްޓްތަކެއް ހަވާލުކޮށްފައެވެ.
=
