ދެކުނު އޭޝިއާގައި ފުރަތަމަ ފަހަރަށް ބޭއްވި ސާފް ފުޓްސަލް ޗެމްޕިއަންޝިޕްގައި ވާދަކޮށް ރާއްޖެއިން ތަށި ނަގައި ކާމިޔާބީ ހޯދި ދިވެހި ގައުމީ ޓީމަށް ހޫނު މަރުހަބާއެއް ކިޔައިފިއެވެ.
ސާފް ފުޓްސަލް ޗެމްޕިއަންޝިޕްގައި ވާދަކޮށް ދިވެހި ގައުމީ ޓީމުން ވަނީ ކުޅުނު ހުރިހާ މެޗަކުން މޮޅުވެފައެވެ. މިކާމިޔާބީ ފާހަގަކުރުމަށްޓަކައި ގައުމީ ފުޓްސަލް ޓީމު ރޭ މާލެ އައުމުން ދިވެހިން ވަނީ ހޫނު މަރުހަބާއެއް ކިޔާފައެވެ. އެގޮތުން، ވެލާނާ އިންޓަނޭޝަނަލް އެއާޕޯޓުން (ވީއައިއޭ) ޓީމަށް މަރުހަބާ ދެންނެވީސްޕޯޓްސް މިނިސްޓަރު އަބްދުﷲ ރާފިއު އާއި ފުޓްބޯޅަ އެސޯސިއޭޝަން އޮފް މޯލްޑިވްސްގެ ރައީސް ރައީސް އަހުމަދު ތޯރިގެވެ.
ދިވެހި ގައުމީ ޓީމަށް މަރުހަބާ ކިޔުމަށްޓަކައި ޓީމުގެ މެންބަރުންގެ އާއިލާގެ ގިނަ ފަރާތްތައް ވަނީ ވީއައިއޭއަށް ގޮސްފައެވެ. އެއާޕޯޓުގެ ތެރެއިން ދިވެހި ގައުމީ ޓީމުގެ ޖާޒީ ލައިގެންނާއި ރަތް ހެދުންތަކުގައި ގިނަ މީހުން މަރުހަބާ ކިޔަން ގޮސްފައިވާ މަންޒަރު ފެނިފައިވެއެވެ. އަދި ސަޕޯޓަރުންނަށާއި އާއިލީ މެންބަރުންނަށް ޓީމްގެ މެންބަރުންނާ ބައްދަލު ކުރުމުގެ ފުރުސަތު ވެސް ވަނީ ދެވިފައެވެ.
އެއަށް ފަހު އާޓިފިޝަލް ބީޗްގައި ވަނީ ޓީމަށް މަރުހަބާ ކިޔުމަށްޓަކައި ހާއްސަ ޝޯތަކެއް ކުރިއަށް ގެންގޮސްފައެވެ. މިއާއެކު، ހަވާ ވެސް އަރުވާފައިވެއެވެ.
