އިންޑިއާގެ ވެސްޓު ބެންގޯލްިއން ފެނިފައިވާ ނިޕާ ބަލީގެ ބިރު ރާއްޖެއަށް އަދި ނެތް ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭން ނެރުނު ބަޔާނުގައި ބުނެފައިވާ ގޮތުގައި މިވަގުތު ރާއްޖެއަށް ނިޕާ ބަލީގެ ނުރައްކާ އޮތް މިންވަރު ކުޑަކަމަށެވެ. ނަމަވެސް، އެ އިދާރާއިން އަންނަނީ ހާލަތު މޮނިޓާ ކުރަމުން ކަމަށް ވެސް ބުނެފައިވެއެވެ. އަދި ހުޅަނގު ބެންގޯލް ސަރަހައްދަށް ދަތުރުކުރާ ފަރާތްތަކުން ސަމާލުވުމަށް ވެސް އެޗްޕީއޭއިން އެދިފައިވެއެވެ.
ނިޕާ ވައިރަސް އަކީ ޓެރޯޕަސް އާއިލާގެ ވާލުން އަދި އޫރުން އިންސާނުންނަށް ފެތުރޭ ބައްޔެކެވެ. މިބާވަތުގެ ވާ ކައިފަ ވާ މޭވާ ނުވަތަ ވާލުގެ ކުޅު ނުވަތަ ކުޑަކަމުދާ އެއްޗެހި ޖެހިފައިވާ މޭވާއާއި ތަރުކާރީފަދަ ތަކެތި ބޭނުންކުރުމުން އިންސާނުންނަށް ބަލި ފެތުރެއެވެ. މީގެ އިތުރުން ބަލި ޖެހިފައިވާ މީހުންނާއި ގާތްކޮށް އުޅޭ ފަރާތްތަކަށް ވެސް ބަލި ފެތުރުމުގެ ފުރުސަތު އޮވެއެވެ.
ބަލިޖެހޭ މީހުންގެ ފަރާތުން ފެންނަ އަލާމާތްތައް:
- ހުން އައުން
- ބޮލުގައި ރިއްސުން
- ކެއްސުން، ކަރުގަ ރިއްސުން
- ނޭވާލާން އުނދަގޫވުން
- ބަލިބޮޑުވަމުންދާ ވަރަކަށް ބައެއް މީހުންގެ ސިކުނޑިއަށް އަސަރުކޮށް ވާނުވާ ނޭނގުން ނުވަތަ ފިޓުޖެހުން
އެޗްޕީއިން ބުނިގޮތުގައި މި ބަލިޖެހޭ ބައެއް މީހުންގެ ފަރާތުން އެއްވެސް އަލާމާތެއް ނުފެނިވެސް ހިނގައިދާނެ ކަމަށެވެ. މި ބައްޔަށް ވަކި ހާއްސަ ފަރުވާއެއް ނެތް ނަމަވެސް ބަލީގެ އަލާމާތްތަކަށް ފަރުވާ ކުރެވޭ ކަމަށް އެޗްޕީއޭ އިން ބުނެފައިވެއެވެ.
މިމަހު މިބައްޔައް އިންޑިއާގެ ހުޅަނގު ބެންގޯލް އިން ތިން މީހަކު ފައްސިވެފައިވެއެވެ. އަދި މީގެ ކުރީ އަހަރުތަކުގައި ނިޕާގެ ވޭދަނަތަކެއް އިންޑިއާ އަދި އެހެން ގައުމު ތަކުންވެސް ރިޕޯޓް ކޮށްފައިވެއެވެ.
އެޗްޕީއޭއިން ބުނިގޮތުގައި ބެންގޯލް އިން ނިޕާ ވައިރަހަށް ފައްސިވި މީހުންނާ ގާތުން އެއްތާވި 180 އަށްވުރެ ގިނަ މީހުން ދެނެގަނެވި، އެމީހުން މިހާރު އެކަހެރި ކުރެވިފައިވާ ކަމަށެވެ. އަދި އެކަހެރި ކުރެވިފައިވާ މީހުންގެ ހާލަތުދަނީ އެގައުމުގެ ކަމާ ބެހޭ ފަރާތްތަކުން ވަރަށް ގާތުން ބަލަމުންދާކަމަށެވެ. މިއާއެކު، ބަލި ޖެހިގެން އިތުރު ވޭދަނައެއް އަދާއި ހަމައަށް ފެނިފައި ނުވާއިރު މި ވޭދަނަތަކާއި ގުޅިގެން އިންޑީއާގެ އިތުރު އެއްވެސް ސަރަހައްދަކުން އަދި އެހެން ގައުމަކުން މިބަލި ފެނިފައިވާ ކަމުގެ ރިޕޯޓް ކޮށްފައިވާ ނުވާ ކަމަށް ވެސް އެޗްޕީއޭއިން ބުނެފައިވެއެވެ.
