ރާއްޖޭގައި ގާއިމުކުރާ ސްޕެޝަލް އިކޮނޮމިކް ޒޯން (އެސްއީޒެޑް)ގައި ހިންގޭ އިންވެސްޓްމެންޓުތަކުގެ ތެރޭގައި ގޭހާއި ތެލުގެ އިތުރަށް މައުދަން ހޯދުމުގެ މަސައްކަތަށް އިންވެސްޓް ކުރެވޭ ގޮތަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު އިތުރުކުރައްވައިފިއެވެ.
އެސްއީޒެޑްގައި ހިންގިދާނެ އިގްތިސާދީ މަސައްކަތްތައް ކަމުގައި ކަނޑައަޅުއްވާފައިވަނީ، ޖުމުލަ 100 މިލިޔަން އެމެރިކާ ޑޮލަރަށްވުރެ ކުޑަނޫން އަދަދުގެ އިންވެސްޓްމަންޓްތައް ކަމަށް ރައީސް ވަނީ ކުރިން ކަނޑައަޅުއްވާފައެވެ. އަދި ޖުމުލަ 500 މިލިޔަން އެމެރިކާ ޑޮލަރަށްވުރެ ކުޑަނޫން އަދަދެއްގެ އިންވެސްޓްމަންޓް ހިމެނޭގޮތަށް ތަރައްގީ ކުރުމަށް ހުށަހަޅާ ސަސްޓެއިނަބަލް ޓައުންޝިޕް ޑިވެލޮޕްމަންޓް މަޝްރޫއުތައް ކަމަށް ކަޑައަޅުއްވާފައިވެއެވެ.
ޖުމްލަ 100 މިލިޔަން އެމެރިކާ ޑޮލަރަށްވުރެ ބޮޑު އަދަދެއް ހުށަހަޅަން ޖެހޭ އިންވެސްޓްމެންޓުތަކުގެ ގޮތުގައި ރައީސް ކަނޑައެޅުއްވީ:
- އެކްސްޕޯޓަށް އިސްކަންދީގެން ހިންގާ މެނުފެކްޗަރިންގެ އެކި ބާވަތުގެ މަސައްކަތްތައް.
- ޓްރާންސްޝިޕްމަންޓް ޕޯޓް، އިންޓަރނޭޝަނަލް ލޮޖިސްޓިކްސް، ޕޯޓް، އެއަރޕޯޓް،
ބަލްކް ބްރޭކިން، ބަންކަރިން، ޑޮކިންގ ސަރވިސަސް. - ޔުނިވަރސިޓީ، ޓާޝަރީ ހޮސްޕިޓަލް، ސްޕެޝަލިޓީ ހޮސްޕިޓަލް، ދުނިޔޭގެ ފެންވަރުގެ ރިސަރޗް އެންޑް ޑިވެލޮޕްމަންޓް ފެސިލިޓީތައް.
- ދުނިޔޭގެ ފެންވަރުގެ އިންފޮމޭޝަން ކޮމިއުނިކޭޝަން ޓެކްނޮލޮޖީ (އައި.ސީ.ޓީ) ޕާކް، އައި.ސީ.ޓީއާ ގުޅޭ ފެސިލިޓީތައް.
- އިންޓަރނޭޝަނަލް ފައިނޭންޝަލް ސަރވިސަސް، އިންޓަނޭޝަނަލް ޓްރޭޑް ސެންޓަރުތައް.
- އިޢާދަކުރަނިވި ހަކަތައިގެ ދާއިރާ.
- ރާއްޖޭގައި ނެތް ޓެކްނޮލޮޖީއެއް ރާއްޖެއަށް އާންމުކުރުމަށް ހިންގޭ މަސައްކަތްތައް.
- ފުޑް ސެކިއުރިޓީގެ ދާއިރާ.
- ތެލާއި، ގޭހާއި، މިނަރަލް އެކްސްޕްލޮރޭޝަންގެ މަސައްކަތްތައް.
ކުރިން ރައީސް އަބްދުﷲ ޔާމީންގެ ސަރުކާރުގައި އެސްއީޒެޑް އިންވެސްޓްމެންޓުގެ އެންމެ ކުޑަ އަގަކީ 150 މިލިއަން ޑޮލަރު ކަމަށް ވަނީ ކަނޑައަޅުއްވާފައެވެ. ނަމަވެސް ރައީސް މުއިއްޒު ވަނީ 2023 ވަނަ އަހަރުގައި މިއަދަދު 100 މިލިއަން ޑޮލަރަށް ކުޑަކޮށްދެއްވާފައެެވެ. މީގެ އިތުރުން މި އަހަރުގެ ގަރާރަށް ރައީސް ވަނީ ގޭހާއި ތެލުގެ އިތުރަށް މައުދަން ހޯދުމުގެ މަސައްކަތް އިތުރުކޮށްފައެވެ. ކުރީ އަހަރު ގަރާރުގައި ހަމައެކަނި ކަނޑައަޅާފައި ވަނީ ގޭސް ހޯދުން އެކަންޏެވެ.
