ބޮޑު ޗުއްޓީއަކަށް ފަހު ދިރާސީ އައު އަހަރުގެ ކިޔެވުން މިއަދު ފަށައިފި އެވެ.
ސަރުކާރުގެ 219 ސުކޫލެއްގައި މިއަދު ކިޔެވުން ފަށާފައިވެއެވެ. އެގޮތުން ޕްރީސުކޫލުން ގްރޭޑް12އާ ހަމައަށް 80،715 ދަރިވަރުން ސްކޫލުތަކުގައި މިއަހަރު ކިޔަވަމުން ދާނެއެވެ. އަދި މި ދަރިވަރުންނަށް ކިޔަވާ ދިނުމަށް 9900 އަށް ވުރެ ގިނަ ޓީޗަރުން މަސައްކަތް ކުރާނެ ކަމަށް އެޑިއުކޭޝަން މިނިސްޓްރީގެ ތަފާސް ހިސާބުތަކުން ދައްކައެވެ.
މިނިސްޓްރީން ކުރިން ނެރުނު ތަފާސް ހިސާބުތަކުން ދައްކާގޮތުގައި އަތޮޅުތަކުން ގުރޭޓާ މާލެއަށް 1،530 ދަރިވަރުން ބަދަލުވެފައިވެ އެވެ. އެގޮތުން އަތޮޅުކުން ހުޅުމާލެއަށް 753 ދަރިވަރުން، އަތޮޅުތަކުން މާލެއަށް 694 ދަރިވަރުން އަދި އަތޮޅުތަކުން ވިލިމާލެއަށް 83 ދަރިވަރުން ބަދަލުވެފައިވެ އެވެ. އަދި މާލެއިން ހުޅުމާލެއަށް 836 ދަރިވަރުން ބަދަލުވެފައިވާ ކަމަށް މިނިސްޓްރީން ހާމަކޮށްފައިވެ އެވެ. އެއާއެކު، މާލެ ސަރަހައްދުތަކުގެ ސްކޫލްތަކަށް ގްރޭޑް އެކަކަށް އަލަށް 1748 ކުދިން ވަނީ ވައްދާފައެވެ.
އައު އަހަރުގެ ކިޔެވުން ފެށުމާއެކު، ފޭސް 2 ގައި އަލައް ގާއިމުކޮށްފައިވާ ޝަހީދު އަލީ ސުކޫލުގަ ވެސް މިއަދު ވަނީ ކިޔަވަން ފަށާއެވެ. މި ސުކޫލު ހުޅުވުމުގެ ރަސްމިއްޔާތުގައި ވާހަކަ ދައްކަވަމުން އެޑިއުކޭޝަން މިނިސްޓަރު ވަނީ މި ސުކޫލުގައި 2000 އަށް ވުރެ ގިނަ ދަރިވަރުން ކިޔެވުމުގެ ފުރުސަތު ދީފައިވާ ކަމަށް ވިދާޅުވެފައެވެ.
