ސަރުކާރުގެ “އާއިލީ ބޯހިޔާވަހިކަން” ޕްރޮގްރާމުގެ ދަށުން ދޫކުރާ ބިމާއި ފުލެޓަށް އެދި މިހާތަނަށް 1616 އެޕްލިކޭޝަން ހުށަހަޅާފައިވާ ކަމަށް ހައުސިން މިނިސްޓްރީން ހާމަކޮށްފި އެވެ.
ހައުސިން މިނިސްޓްރީން ނެރުނު ތަފާސްހިސާބުތަކުން ދައްކާގޮތުގައި މިހާތަނަށް ބިމާއި ފުލެޓަށް އެދި 1616 އެޕްލިކޭޝަން ހުށައަޅާފައިވެއެވެ. އެގޮތުން ފުލެޓަށް އެދި 1160 އެޕްލިކޭޝަން އަދި ބިމަށް އެދި 456 އެޕްލިކޭޝަން ހުށައަޅާފައިވެއެވެ. މިއާއެކު، ޑުރާފްޓް ސްޓޭޖްގައި 7605 އެޕްލިކޭޝަން އެބަހުރި ކަމަށް މިނިސްޓްރީން ބުންޏެވެ.
ފްލެޓަށް އެޕްލިކޭޝަން ހުށައެޅުމުގެ ސުންގަޑިއަކީ އޭޕްރީލް 17 ވަނަ ދުވަހުގެ 23:59 އެވެ. ގޯއްޗަށް އެދި އެޕްލިކޭޝަން ހުށައެޅުމުގެ ސުންގަޑިއަކީ މާޗު 4 ވަނަ ދުވަހުގެ 23:59 އެވެ. އެޕްލިކޭޝަން ހުށައަޅަން ޖެހެނީ ހައުސިން މިނިސްޓަރީގެ ބޯހިޔާވަހިކަމުގެ ޕޯޓަލް (https://boahiyaavahikan.housing.gov.mv) އަށެވެ.
ބޯހިޔާވަހިކަމުގެ މި ސްކީމްގެ ދަށުން ސަރުކާރުން ވަނީ 7900 ފްލެޓް ދޫކުރުމަށް ނިންމާފައެވެ. އެގޮތުން މާލެ ރައްޔިތުންނަށް ގުރޭޓާ މާލެ ސަރަހައްދުންނާއި ރަސްމާލެއިން ގޯތި ދޭއިރު މާލޭގައި 15 އަހަރަށް ވުރެ ގިނަ ދުވަހު ދިރިއުޅެފައިވާ އެހެން ރަށްރަށުގެ ރައްޔިތުންނަށް ރަސްމާލޭން ދޭ ގޮތަށް ވަނީ އުސޫލު ކަނޑައަޅާފަ އެވެ. މި ސްކީމްގެ ދަށުން ދޫކުރުމަށް ހަމަޖެހިފާ ގޯތީގެ ބޮޑު މިނަކީ 1250 އަކަފޫޓެވެ.
