މި އަހަރު ތެރޭގައި މުޅިން އާ 22 މަޝްރޫއެއްގެ މަސައްކަތް ފަށާނެކަމަށް ހެލްތު މިނިސްޓަރު އަބްދުﷲ ނާޒިމް އިބްރާހިމް ވިދާޅުވެއްޖެއެވެ.
މިނިސްޓަރު މިފަދައިން ވިދާޅުވީ ސަރުކާރުގެ ތަރުޖަމާން ހީނާ ވަލޯދު ގެނެސްދެއްވާ “ތަރުޖަމާނާއެކު” ޕޮޑްކާސްޓުގައި ވާހަކަ ދައްކަވަމުންނެވެ.
މިނިސްޓަރު ވިދާޅުވިގޮތުގައި މިހާރު ރާއްޖޭގެ އެކި ކަންކޮޅުތަކުގައި 160 އަށް ވުރެ ގިނަ ސިއްހީ ހިދުމަތްދޭ ތަންތަނުގެ މަސައްކަތް ކުރަމުން އެބަދެ އެވެ. އެގޮތުން، އެކި މަރުހަލާތަކުގައި 30 އަށް ވުރެ ގިނަ ހޮސްޕިޓަލްތައް އަޅަމުންދާއިރު 20 އަށް ވުރެ ގިނަ ހެލްތް ސެންޓަރު އެޅުމުގެ މަސައްކަތާއި 90 އަށް ވުރެ ގިނަ ހެލްތު ސެންޓަރު އެކްސްޕޭންޑް ކުރުމުގެ މަސައްކަތް ވެސް ކުރިއަށްދާކަން މިނިސްޓަރު ފާަހަގަކުރެއްވި އެވެ.
މިއާއެކު 22 ޕުރޮޖެކްޓެއް މިއަހަރުގެ ކުރީކޮޅު ފަށަން ނިންމާފައިވާ ކަމަށް މިިނިސްޓަރު ވިދާޅުވެފައިވެއެވެ.
މިނިސްޓަރު އިތުރަށް ވިދާޅުވިގޮތުގައި ވޭތުވެދިޔަ އަހަރުތަކުގައި ރާއްޖޭގެ ސިއްހީ ދާއިރާއަށް އިންސާނީ ވަސީލަތް އިތުރުނުވާ ވަރަށް މި ދެ އަހަރު ތެރޭގައި ވަނީ އިތުރުކުރެވި ފައެވެ. އަތޮޅުތެރެއަށް އެކަނި ވެސް 700 އެއްހާ މުއައްޒަފުން އިތުރަށް ސިއްހީ ހިދުމަތަށް ނެރެފައިވާ ކަމަށް މިނިސްޓަރު ވިދާޅުވި އެވެ. އެކަމަކީ ދައުލަތުން ވަރަށް ބޮޑު ހޭދައެއްކުރަންޖެހުނު ކަމެއް ނަމަވެސް ސިއްހީ ކޮންމެ ހިދުމަތަކީ މުހިއްމު ހިދުމަތަކަށް ވާއިރު މުއައްޒަފުން މަދުވެގެން ރައްޔިތުންނަށް ފޯރުކޮށް ނުދެވުމަކީ ވަރަށް ކަންބޮޑުވާންޖެހޭ ކަމެއް ކަމަށް އޭނާ ވިދާޅުވި އެވެ.
