ދެމެހެއްޓެނިވި ތަރައްގީއާއި ދުނިޔޭގެ ކުރިއެރުމުގެ މައިގަނޑު ބިންގާއަކީ ތައުލީމުކަމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ވިދާޅުވެއްޖެ އެވެ.
ރައީސް މިފަދައިން ވިދާޅުވެފައި ވަނީ ‘އެކްސް’ގައި މިއަދު ކުރެއްވި ޕޯސްޓެއްގަ އެވެ. ރައީސް ވިދާޅުވީ، ތައުލީމީ ދާއިރާ ބައްޓަންކުރުމުގައި ޒުވާނުންގެ ބައިވެރިވުން އިތުރުކޮށް، ބާރުވެރިކުރުވުމަށް ސަރުކާރުން އިސްކަންދޭނެ ކަމަށެވެ. އުނގެނުމުގެ މާހައުލަކީ އެންމެނަށް ބައިވެރިވެވޭ، ޒަމާނާ ގުޅޭ ނިޒާމަކަށް ހެދުމަށް މަސައްކަތް ކުރައްވާނެ ކަމަށް ވެސް ވިދާޅުވި އެވެ.
ރައީސް ވަނީ ތައުލީމަކީ ގައުމު ތަރައްގީ ކުރުމުގެ ހިތްކަމުގައި ވިދާޅުވެފައެވެ. އަދި ފާއިތުވެ ދިޔަ ދެ އަހަރުތެރޭގައި ފަސްޓް ޑިގްރީ ސްކީމްގެ ދަށުން 6،000 އަށް ވުރެ ގިނަ ދަރިވަރުން ކިޔަވާފައިވާ ކަމަށް އެމަނިކުފާނު ވިދާޅުވެފަ އެވެ.
ދަރިވަރުންނަށް އިންވެސްޓްކޮށް، ތައުލީމީ ފުރުސަތުތައް ފަހިކޮށްދީ ކުރިއެރުމުގެ ފުރުސަތު ދިނުމަކީ ވަރަށް މުހިންމު ކަމެއް ކަމަށް ރައީސް ވިދާޅުވި އެވެ.
