މިފަހަރު މާލެ ސަރަހައްދުގައި 37 ދިވެހި ހާފިޒުން އިމާމުވެ ތަރާވީސްކުރާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެއެވެ.
މިނިސްޓަރު ވިދާޅުވި ގޮތުގައި މިފަހަރު މާލެ ސަރަހައްދުގައި 37 ދިވެހި ހާފިޒުން އިމާމުވެ، ހިފްޒުކޮށް ތަރާވީސް ކުރާނެކަމަށާއި މީގެ ތެރެއިން ގިނަވާނީ ވަރަށް ޒުވާން، އަދި ރީތިކޮށް ކިޔަވާ ހާފިޒުންނެވެ. އަދި މި ރޯދަ މަހުގައި އިސްލާމީ މަރުކަޒާއި ސަލްމާން ސެންޓަރުގައި ވެސް ފާހަގަކޮށްލެވޭ ޒުވާން ހަތީބުންނަށް ހުތުބާ ކިޔަން ފުރުސަތު ދެވިގެންދާނެ ކަމަށް މިނިސްޓަރު ވިދާޅުވި އެވެ. މިއާއެކު، އިސްލާމީ މަރުކާޒާއި ސަލްމާން ސެންޓަރުގައި އިމާމުވެ ތަރާވީސްކުރާނީ ދިވެހި ހާފިޒުންނެވެ.
އޭގެއިތުރުން، މިނިސްޓަރު ވަނީ ކުރުކޮށް ކިޔަވައި ނަމާދުކުރާ މިސްކިތްތައް އިތުރުކޮށްފައިވާނެކަމަށާއި ބޮޑެތި ބައެއް މިސްކިތްތަކުގައި ވެސް ކުރުކޮށް ކިޔަވައި ތަރާވީސް ނަމާދު ކުރުމަށް ފުރުސަތު ފަހިކޮށްފައިވާ ކަމަށް ވެސް ވިދާޅުވެފަ އެވެ. އެއީ އެފަދަ ޖަމާއަތްތަކަށް ގިނަ މީހުން އެއްވާތީކަމަށް ވެސް މިނިސްޓަރު ވިދާޅުވެފައިވެއެވެ.
އެގޮތުން، އާއްމުކޮށް ކުރުކޮށް ކިޔަވައި ތަރާވީސްކުރާ، މިސްކިތެއްކަމުގައިވާ މަޖީދީ މަގުގައި ހުންނަ ސުލްޠާން އާދިލް މިސްކިތުގައި މިފަހަރު ތަރާވީސް ކުރާނީ ދިގުކޮށް، ހިފްޒުކޮށްކަމަށާއި ބަރުބަރީ މިސްކިތުގައި ކުރާނީ ކުރުކޮށެވެ. މިނިސްޓަރު މިގޮތަށް ނިންމެވީ އާދިލް މިސްކިތުގައި ކުރުކޮށް ކުރާތީވެ، ޖަމާއަތް ބޮޑުވެގެން ގޮސް މަޖީދީ މަގު ބްލޮކްވެ ރައްޔިތުންނާއި ދުއްވާ އުޅަނދުތަކަށް ދަތިތަކާ ކުރިމަތިލާން ޖެހޭތީ އެކަމަށް ހައްލެއް ހޯދައިދިނުމަށްޓަކައެވެ.
އިސްލާމިކް މިނިސްޓަރީގެ އަމާޒަކީ 2027 ގައި މާލެ ސަރަޙައްދުގައި އިމާމުވެ ތަރާވީސްކުރާ އެންމެހައި ހާފިޒުންނަކީ ދިވެހިންނަށް ހެދުމެވެ. މިފަހަރު މާލެ ސަރަހައްދުގައި ބޮޑު ޖަމާއަތްތަކުގައި އިމާމުވެ އީދު ނަމާދު ކުރާ ބޭފުޅުންގެ ތެރޭގައި ފާހަގަކޮށްލެވޭ ޒުވާން ހަތީބުން ހިމެނޭ އެވެ.
