ރާއްޖެއަށް ޗާގޯސް ލިބުން ހައްގުކަމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ވިދާޅުވެއްޖެ އެވެ.
ރައީސް މިފަދައިން ވިދާޅުވެފައި ވަނީ އިނގިރޭސިވިލާތުގެ ޓެބްލޮއިޑެއް ކަމަށްވާ އެކްސްޕްރެސް އަށް ދެއްވި އިންޓަވިއުއެއްގައެވެ. ރައީސް ވަނީ ރާއްޖޭގެ ދެކުނުން އިންޑިއާ ކަނޑުގައި އޮންނަ ޗާގޯސް އިސްތިއުމާރުކޮށްގެން ތިބި އިނގިރޭސިން އެ އަތޮޅު މޮރިޝަސްއާ ހަވާލުކުރިޔަސް އެތަން ލިބުން އެންމެ ހައްގުކަން ބޮޑު ގައުމަކީ ދިވެހިރާއްޖެ ކަމަށް ވިދާޅުވެފައެވެ.
ޖުމުހޫރީ ދުވަހުގައި ވާހަކަފުޅު ދައްކަވަމުން ރައީސް ވަނީ އިނގިރޭސިވިލާތުގެ މޮރިޝަސްއަށް ޗާގޯސް ދިނުމުން އެކަމާމެދު ކޮންބޮޑުވުން ފާޅުކުރައްވާ، އެ ޖަޒީރާ ލިބުން ހައްގުވަނީ ރާއްޖެއަށް ކަމަށް ބުނެ 2024 ވަނަ އަހަރުގައި އިނގިރޭސިވިލާތައް ސިޓީފުޅެއް ފޮނުއްވިކަމަށް ވިދާޅުވެފައެވެ.
އެ އިންޓާވިއުގައި ރައީސް ވަނީ ރާއްޖެއާއި ޗާގޯސްއާއި ހުރި ތާރީހީ ގުޅުންތަކަށް އަލިއަޅުވާލައްވައި ރާއްޖެއަށް ޗާގޯސް ލިބެންޖެހޭ ސަބަބުތައް ވެސް ވިދާޅުވެފައެވެ. އެގޮތުން ދިވެހި ބަހުން ލިޔެފައިވާ މަހާނަގާ ޗާގޯސް އިން ފެނިފައިވުމާއި ޗާގޯސް އޮތީ ރާއްޖެއާ ދެމެދު 310 މޭލު ދުރުގައި ކަމުގައި ފާހަގަކުރައްވާފައެވެ. ނަމަވެސް މޮރިޝަސްއާއި ޗާގޯސްއާ ދެމެދުގައި 1،300 މޭލު ހުރިކަން ފާހަގަކޮށް، ޗާގޯސް ލިބެންޖެހޭނީ ރާއްޖެއަށް ކަމަށް އެމަނިކުފާނު ވަނީ ފާހަގަކުރައްވާފައެވެ.
މޮރިޝަސުން ވަނީ ދިވެހިރާއްޖެ އާއި ޗާގޯސްގެ ކަނޑުގެ ސަރަހައްދާ ފުށުއަރާ ހިސާބުގެ އިން ވަކިކޮށްދިނުމަށް އެދި އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އަށް މައްސަލަ ހުށައަޅާފައެވެ. އެހެންވެ މޮރިޝަސް އިން ހުށަހެޅި ގޮތަށް ކަނޑުގެ ސަރަހައްދު އިން މިހާރު ވަނީ ވަކިކޮށްފަ އެވެ.
