ރާއްޖެއަށް ގަވާއިދާ ހިލާފަށް އެތެރެކޮށްފައިވާ ބޭސްތަކެއް ވިއްކާ މައްސަލައެއް މޯލްޑިވްސް ފުޑް އެންޑް ޑްރަގު އޮތޯރިޓީ (އެމްއެފްޑީއޭގެ) ސަމާލުކަމަށް އައިސްފައިވާ ކަމަށް އެ އިދާރާއިން ބުނެފިއެވެ.
އެމްއެފްޑީއޭއިން ބުނިގޮތުގައި މިހާރަކަށް އައިސް ނަގަންޖެހޭ ހުއްދަތައް ނުނަގައި އެކި ކަންކަމަށް ބޭނުންކުރާ ބޭސް އެތެރެކޮށް ތަފާތު އޮންލައިން ޕޭޖްތަކުގައި އިޝްތިހާރުކޮށް ވިއްކަމުން ގެންދާކަން އެ އިދާރާއަށް ފާހަގަކުރެވިފައިވާކަމަށެވެ. އެގޮތުން، ލޭގައި ހަކުރު ހުންނަ މިންވަރު ދަށްކުރުމަށް ބޭނުންކުރާ ސެމަގުލުޓައިޑް އަކީ ބަރުދަން ލުއިކުރާ ބޭހެއް ކަމަށާއި ހަމުގެ މައްސަލަތަކުގައި ބޭނުންކުރާ އެޒޭލެކް އެސިޑަކީ މޫނުގެ ހަންގަނޑު ރީތިކޮށް އަލިކުރާ ބޭހެއް ކަމަށް ބުނެ އޮންލައިން ޕޭޖްތަކުގައި އިޝްތިހާރުކޮށް ވިއްކަމުން ގެންދާކަން އެ އިދާރާއިންއަށް ރިޕޯޓްކޮށްފައިވެއެވެ.
އެމްއެފްޑީއޭއިން ބުނިގޮތުގައި އެފަދަ ބޭސްތަކަކީ ކޮންމެހެން ބޭނުންކުރަންޖެހޭ ހާލަތުގައި އެކަމެއްގެ ހާއްސަ ޑޮކްޓަރު ލިޔެދިނުމުން ނޫންގޮތަކަށް ބޭނުންކޮށްގެންވާނެ ބޭސްތަކެއް ނޫންކަމަށެވެ. އަދި ފާމަސީ ތަކުން ވެސް އެފަދަ ބޭސްތައް ދޫކުރަނީ ޑޮކްޓަރު ލިޔެއްދީފައިވާ ބޭސް ސިޓީއަށް ކަމަށް އެ އިދާރާއިން ބުނެފައިވެއެވެ. ޑޮކްޓަރެއްގެ ލަފަޔާއި އިރުޝާދާއި ނުލައި އެފަދަ ބޭސް ބޭނުންކުރުމުން ހީވެސް ނުކުރާފަދަ ހިތާމަވެރި ހާލަތަކަށް ހުށަހެޅިދާނެ ކަމުގެ ބިރު ވަރަށް ބޮޑެވެ.
ވިޔަފާރީގެ ގޮތުގައި ރާއްޖެއަށް ބޭސް އިމްޕޯޓްކޮށް ވިއްކޭނީ ބޭހާއި ބެހޭ ގައިދުގައިވާ ގޮތުގެ މަތިން އެމްއެފްޑީއޭގައި ބޭސް އިމްޕޯޓްކުރާ އަދި ވިއްކާ ފަރާތެއްގެ ގޮތުގައި ރަޖިސްޓްރީކޮށް ހުއްދަ ލިބިގެންނެވެ. އަދި އިމްޕޯޓްކުރާ ހުރިހާ ބޭހަކީ ވެސް އުސޫލުތަކާއި އެއްގޮތަށް ރަޖިސްޓްރީކޮށް ރާއްޖެއަށް އިމްޕޯޓްކޮށް ވިއްކުމަށް ހުއްދަ ދީފައިވާ ބޭހުގެ ލިސްޓްގައި ހިމެނިފައިވާ ބޭހަކަށް ވާންޖެހޭނެ ކަމަށް އެމްއެފްޑީއޭގެ ގަވާއިދުތަކުގައި ބަޔާންކޮށްފައިވެއެވެ.
އެހެންކަމުން އެ އިދާރާއިން ނަގަންޖެހޭ ހުއްދަ ނުނަގައި ބޭސް އިމްޕޯޓްކޮށް ވިއްކާ އަދި އިޝްތިހާރުކުރާ ފަރާތްތަކާ މެދު ބޭހާއިބެހޭ ގައިދުގެ ދަށުން ފިޔަވަޅު އަޅަމުން ގެންދާނެ ކަމަށް އެ އިދާރާއިން ބުނެފައިވެއެވެ.
