ސަރުކާރުގެ “އާއިލީ ބޯހިޔާވަހިކަން” ޕްރޮގްރާމުގެ ދަށުން ދޫކުރާ ބިމާއި ފުލެޓަށް އެދި މިހާތަނަށް 518 އެޕްލިކޭޝަން ހުށަހަޅާފައިވާ ކަމަށް ހައުސިން މިނިސްޓްރީން ހާމަކޮށްފި އެވެ.
ހައުސިން މިނިސްޓްރީން މިއަދު ނެރުނު ތަފާސްހިސާބުތަކުން ދައްކާގޮތުގައި ފާއިތުވެ ދިޔަ 24 ގަޑިއިރު ތެރޭގައި ބިމާއި ފުލެޓަށް އެދި މިހާތަނަށް 518 އެޕްލިކޭޝަން ހުށައަޅާފައިވެއެވެ. އެގޮތުން ފުލެޓަށް އެދި 399 އެޕްލިކޭޝަން އަދި ބިމަށް އެދި 119 އެޕްލިކޭޝަން ހުށައަޅާފައިވެއެވެ. މިއާއެކު، ޑުރާފްޓް ސްޓޭޖްގައި 3،836 އެޕްލިކޭޝަން އުޅޭކަމަށް އެތަފާސްހިސާބުތަކުން ދައްކައެވެ.
ފްލެޓަށް އެޕްލިކޭޝަން ހުށައެޅުމުގެ ސުންގަޑިއަކީ އޭޕްރީލް 17 ވަނަ ދުވަހުގެ 23:59 އެވެ. ގޯއްޗަށް އެދި އެޕްލިކޭޝަން ހުށައެޅުމުގެ ސުންގަޑިއަކީ މާޗު 4 ވަނަ ދުވަހުގެ 23:59 އެވެ. އެޕްލިކޭޝަން ހުށައަޅަން ޖެހެނީ ހައުސިން މިނިސްޓަރީގެ ބޯހިޔާވަހިކަމުގެ ޕޯޓަލް (https://boahiyaavahikan.housing.gov.mv) އަށެވެ.
ބޯހިޔާވަހިކަމުގެ މި ސްކީމްގެ ދަށުން ސަރުކާރުން ވަނީ 7900 ފްލެޓް ދޫކުރުމަށް ނިންމާފައެވެ. އެގޮތުން މާލެ ރައްޔިތުންނަށް ގުރޭޓާ މާލެ ސަރަހައްދުންނާއި ރަސްމާލެއިން ގޯތި ދޭއިރު މާލޭގައި 15 އަހަރަށް ވުރެ ގިނަ ދުވަހު ދިރިއުޅެފައިވާ އެހެން ރަށްރަށުގެ ރައްޔިތުންނަށް ރަސްމާލޭން ދޭ ގޮތަށް ވަނީ އުސޫލު ކަނޑައަޅާފަ އެވެ. މި ސްކީމްގެ ދަށުން ދޫކުރުމަށް ހަމަޖެހިފާ ގޯތީގެ ބޮޑު މިނަކީ 1250 އަކަފޫޓެވެ.
