މާލޭގެ މޭޔަރަކަށް ހޮވަންޖެހޭނީ ސަރުކާރުން ރާވާ ތަރައްގީއަށް އެއްބާރުލުން ދޭނެ ކެޑިޑޭޓެއްކަމަށް ނައިބުރައީސް ހުސެއިން މުހައްމަދު ލަތީފް ވިދާޅުވެއްޖެ އެވެ.
ނައިބު ރައީސް މިފަދައިން ވިދާޅުވެފައި ވަނީ ޕީއެންސީގެ ޓިކެޓުގައި މާލެ ސިޓީ ކައުންސިލްގެ މޭޔަރުކަމަށް ވާދަކުރައްވާ މޫސާ އަލީ ޖަލީލްގެ ކެމްޕެއިން އޮފީސް ހުޅުވުމަށް ރޭ ބޭއްވި ޖަލްސާގައި ވާހަކަދައްކަވަމުން ނެވެ. އެމަނިކުފާނު ވިދާޅުވި ގޮތުގައި މޫސާ އަލީ ޖަލީލަކީ ރައީސުލް ޖުމްހޫރިއްޔާ ޑރ މުހައްމަދު މުއިއްޒުގެ ހިދުމަތާއި، ސްޕީޑަގާ އެއްވަރަށް މަސައްކަތް ކުރައްވާނެ ބޭފުޅެކެވެ. އަދި އޭނާއަކީ ޖަވަބު ދާރީ ކުރުވުމުގެ ބަދަލުގައި ކަންކަމަށް ހުރަސް އަޅައިގެން މަސައްކަތް ކުރުވާނެ ބޭފުޅެއް ނޫންކަމަށް ވެސް ވިދާޅުވި އެވެ.
“ގާނޫނު އަސާސީގައި ވަރަށް ސަރީހަ ބަހުން ލިޔެފައި އެބަ ހުރި، މުވައްސަސާތައް ކަނޑައަޅުއްވާފައި، އެކަންކަމަށް ބޭނުންވާ ފަރާތްތައް ރައްޔިތުން އެ ތިއްބެވީ އެ ބޭފުޅުންގެ މަންދޫބުންގެ ގޮތުގައި އިހުތިޔާރު ކުރައްވާފައި، ހޮއްވަވާފައި، އެހެންކަމުން ސަރުކާރު ޖަވާބު ދާރީ ކުރުވާނީ އެ ދާއިރާތަކުގެ މެންބަރުން، އެ މުވައްސަސާތަކުން،” ނައިބު ރައީސް ވިދާޅުވިއެވެ.
ނައިބް ރައީސް ވިދާޅުވީ މާލޭގެ މޭޔަރަކަށް ހޮވަން ވާނީ މާލޭގެ ރައްޔިތުންގެ އަމާންކަމާއި ސުލްހަމަސަލަސް ކަމަށް ބުރޫނާރުވާނެ ކެންޑިޑޭޓެއް ކަމަށެވެ. މޭޔަރު ވާންޖެހޭނީ ސަރުކަރުން ރާވާ ޕްލޭނާއި، ހިންގަން ބޭނުންވާ ތަރައްގީގެ މަޝްރޫއުތަކުގައި އެންމެ ބޮޑު އެހީތެރިކަމެއް ދެވޭނެ، ސީދާ ރައްޔިތުންނާއި ގުޅުން ހުރި ފަރާތަކަށް ކަމަށް އެމަނިކުފާނު ވިދާޅުވި އެވެ.
“އެހެންކަމުން އަޅުގަނޑުމެން އެދެނީ މާލެ ސިޓީގެ ރައްޔިތުންގެ ކިބައިން އެމަނިކުފާނައި، އެމަނިކުފާނާއި އެކީގައި މިއަދު ނުކުމެވަޑައިގެން ތިއްބެވި އަޅުގަނޑުމެންގެ ޕާޓީގެ އެންމެހާ ކެންޑިޑޭޓުންނަށް ވޯޓު ދެއްވުން،”. ނައިބްރައީސް ވިދާޅުވެފައިވެއެވެ.
