މާލޭގެ މޭޔަރުކަމަށް ހޮވައިފިނަމަ ރައްޔިތުންގެ ހިދުމަތުގައި 24 ގަޑިއިރު ހުންނަވާނެ ކަމަށް ކުރިއަށް އޮތް ލޯކަލް ކައުންސިލް އިންތިހާބުގައި ޕީއެންސީގެ ޓިކެޓްގައި ކުރިމަތިލައްވާ ކެންޑިޑޭޓް މޫސާ އަލީ ޖަލީލު ވިދާޅުވެއްޖެ އެވެ.
އޭނާ މިފަދައިން ވިދާޅުވެފައި ވަނީ އޭނާގެ ކެންޕެއިން ޖަގަހަ ހުޅުވުމަށް ރޭ ބޭއްވި ޖަލްސާގައެވެ. މި ޖަލްސާގައި އޭނާ ދެއްކެވި ވާހަކައިގައި ވަނީ ރައީސް. ޑރ. މުހައްމަދު މުއިއްޒަށް ވަރަށް ބޮޑަށް ތައުރީފް ކުރައްވާފަ އެވެ. އެގޮތުން 2011 އިން ފެށިގެން 10 އަހަރު ވަންދެން މާލޭގެ ރައްޔިތުން ބޭނުންވި ކަންކަން ހާސިލްނުވެ އޮތުމަށްފަހު، އެކަންކަން ހާސިލްވީ 2021 ވަނަ އަހަރު ރައީސް ޑރ. މުއިއްޒު މާލޭގެ މޭޔަރު ކަމަށް އިންތިހާބުވެވަޑައިގެންނެވި ފަހުން ކަމަށް އޭނާ ވިދާޅުވި އެވެ.
މީގެއިތުރުން ރައީސް މާލޭގެ މޭޔަރު ކަމުގައި ހުންނެވި އިރު، ރައްޔިތުންގެ ގާތަށް ޒިޔާރަތްކޮށް، އެމީހުންގެ އަޑުއަހައި، ގިނަ ދުވަސްވީ މައްސަލަތަކެއްގެ ހައްލު ހޯއްދާދެއްވާފައިވާކަން އޭނާ ފާހަގަކުރެއްވި އެވެ. އަދި މާލޭގެ މޭޔަރަކަށް އިންތިހާބުކޮށްފިނަމަ އޭނާ މަސައްކަތް ކުރައްވާނީ ރައީސް ނަމޫނާއަކަށް ބަލައިގެން ކަމަށް ވިދާޅުވި އެވެ. އެގޮތުން، ރައްޔިތުން ހަވާލުކުރާ މަސްއޫލިއްޔަތު އަދާކުރުމުގައި 24 ގަޑިއިރު ދެމިހުންނާނެ ކަމަށް އޭނާ ވިދާޅުވި އެވެ.
“މާލޭގެ މޭޔަރުކަމަށް އަޅުގަނޑު ހޮވައިދެއްވައިފިނަމަ، ރައްޔިތުންގެ ހިދުމަތުގައި 24 ގަޑިއިރު ދެމިހުންނާނަން. އަދި އަޅުގަނޑަކީ ކަމަކުން ފިލައިގެންދާނެ މީހެއް ނޫން،” އޭނާ ވިދާޅުވެފައިވެއެވެ.
ކުރިއަށް އޮތް ކައުންސިލް އިންތިހާބުގައި މާލޭގެ މޭޔަރު ކަމަށް ކުރިމަތިލައްވާފައިވާ މޫސާ އަލީ ޖަލީލްގެ ކެމްޕެއިން ޖަގަހަ ހުޅުވާފައި ވަނީ އާޓިފިޝަލް ބީޗް ކުރިމަތީ ހުންނަ ޕާޓީގެ އޮފީހުގަ އެވެ.
