ވޯލްޑް ނޯ ޓޮބޭކޯ ޑޭ އެވާޑް އަށް ކުރިމަތި ލުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ހުޅުވާލައިފި އެވެ.
މި އެވޯޑަކީ ކޮންމެ އަހަރަކު ވެސް މެއި 31 ވަނަ ދުވަހުގައި (ދުނިޔޭގެ ދުންފަތުގެ އިސްތިއުމާލު ނުކުރާ ދުވަސް) ފާހަގަ ކުރުމަށްޓަކައި ދުނިޔޭގެ ސިއްހަތާ ބެހޭ ޖަމިއިއްޔާ (ޑަބްލިއު.އެޗް.އޯ) އިން ދޭ އިނާމެކެވެ. މި އެވޯޑް ދިނުމުގެ މަގުސަދަކީ، ދުންފަތް ކޮންޓްރޯލް ކުރުމަށް ގިނަ ފަރާތަކުން ކުރަމުންދާ މަސައްތަތުގެ އަގު ވަޒަންކޮށް، އެ މަސައްކަތުގައި ދެމިތިބުމަށް ހިއްވަރު ދިނުުމެވެ.
އެގޮތުން، ދުންފަތް ކޮންޓްރޯލް ކޮށް ދުންފަތުގެ ނުރައްކަލުން މުޖުތަމައު ރައްކާޓެރި ކުރުމުގެ ގޮތުން މަސައްކަތް ކުރައްވާ އަދި ވަކީން ހާއްސަކޮށް އެއަހަރެއްގެ ” ދުނިޔޭގެ ދުންފަތުގެ އިސްތިއުމާލު ނުކުރާ ދުވަސް” ގެ ޝިއާރާ ގުޅުންހުރި މަސައްކަތްތައް ކޮށްފައިވާ އަދި ކުރަމުންދާ ފަރުދުންނާއި ޖަމުއިއްޔާތަކާއި އިދާރާތަކަށް މި އެވޯޑަށް ކުރިމަތި ލުމުގެ ފުރުސަތު ވަނީ ހުޅުވާލާފައެވެ.
މި އަހަރުގެ ” ދުނިޔޭގެ ދުންފަތުގެ އިސްތިއުމާލު ނުކުރާ ދުވަސް” ގެ ޝިއާރަކީ ” އަންމާސްކިން ދަ އެޕީލް- ކައުންޓަރިން ނިކޮޓިން އެންޑް ޓޮބޭކޯ އެޑިކްޝަން” ކަމަށް އެޗްޕީން ވަނީ ހާމަކޮށްފައެވެ.
މި އެވޯޑަށް ކުރިމަތިލާން ބޭނުންވާ ފަރާތްތަކުން ޑަބްލިއު.އެޗް.އޯ ގެ ލިންކްގައިވާ ފޯމު ފުރުމަށް ފަހު މި މަހުގެ16 ގެ ކުރިން ހުށައަޅަން ޖެހެއެވެ. މިކަމާ ގުޅޭ އިތުރު މައުލޫމާޓު ބޭނުންވާ ފަރާތްތަކުން އެޗްޕީއޭގެ އީމެއިލަށް އީމެއިލް ކުރެވޭނެ ކަމަށް އެ އެޖެންސީއިން ވަނީ ބުނެފައެވެ.
