ރާއްޖޭގެ ބައެއް ސަރަހައްތުތަކަށް ވަރަށް ވައި ނުސާފުކަމަށް ރާއްޖޭގެ މޫސުމާއި ބެހޭ ގައުމީ އިދާރާ (މެޓް) އިން ބުނެފިއެވެ.
މެޓުން ނެރުނު އިއުލާނުގައި ހާއްސަކޮށް މެދު ރާއްޖެ ތެރެއާއި އުތުރުގެ އަތޮޅުތަކަށް ދުންފުހުގެ އަސަރު ވަރަށް ބޮޑަށް ކުރަމުންދާ ކަމަށް ބުނެފައިވެއެވެ. މިއީ ވޭތުވެ ދިޔަ 7 ދުވަހަށް ބަލާއިރު، މީގެ އަސަރު އެންމެ ބޮޑަށް ކޮށްފައި ވަނީ މިއަދު ކަމަސް މެޓުން ބުނެފއިވެއެވެ.
މޫސުމާ ބެހޭ ރިޕޯޓުތަކުން ދައްކާ ގޮތުގައި، މެދު ރާއްޖެތެރޭގައި ދުރު ފެންނަ މިންވަރު 1.5 ކިލޯމީޓަރަށް ވުރެ ދައްވެފައި ވާކަމަށް މެޓުން ވަނީ ހާމަކޮށްފައެވެ.
މެޓުން ބުނިގޮތުގައި، ކުރިއަށް އޮތް 5 ދުވަހުގަ ވެސް އުތުރުން އަންނަ ވަޔާއެކު، ދުންފުހުގެ އަސަރު ރާއްގޭގައި ހުންނާނެ ކަމަށް ބެލެވެ އެވެ. އެހެންކަމުން ބޭރުގައި އެކި ހަރަކާތަތަކުގައި އުޅޭ އިރު، އެޗް.ޕީ.އޭ ގެ އިރުޝާދުތަކަށް ސަމާލުވުމަށް މެޓުން ވަނީ އިލްތިމާސް ކޮށްފައެވެ. އަދި ކަނޑުދަތުރުކުރާ ފަރާތްތަކުން ވެސް ދަތުރު ކުރާއިރު ހާއްސަ ސަމާލުކަމެއް ދިނުމަށް މެޓުން ވަނީ އެދިފައެވެ.
އުތުރު އިންޑިއާގެ ހިމާލިޔަން ސަރަހައްދުގައި ވައި ތަގައްޔަރުވުމުގެ އަސަރު ރާއްޖެ އަށް މިދިޔަ އަހަރު ވެސް ކޮށްފައި ވާއިރު މި އަހަރު ވެސް އުތުރު އިންޑިއާގައި މި ދުވަސްވަރު ވަނީ ވަރަށް ބޮޑަށް ވައި ނުސާފުވެ ދަތުރުފަތުރަށް ވެސް ހުރަސްއެޅިފަ އެވެ.
