މޯލްޑިވްސް ޒާކާތު ފަންޑު މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ބެލުމުގެ ދަށަށް ބަދަލުކުރުމަށް އެއްބަސްވުމެއްގައި ސޮއިކޮށްފި އެވެ.
އެއްބަސްވުމުގައި ސޮއިކުރި ރަސްމިއްޔާތުގައި، ޒަކާތު ހައުސްގެ ފަރާތުން ސޮއިކުރެއްވީ، އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދެވެ. އެމްއެމްއޭގެ ފަރާތުން ސޮއިކުރައްވާފައިވަނީ، ގަވަރުނަރު އަހުމަދު މުނައްވަރެވެ.
މި އެއްބަސްވުމުގައި ޒަކާތު ފަންޑު ބަލަހައްޓަން ޖެހެނީ، ޕަބްލިކް އެކައުންޓާއި ވަކިން އެމްއެމްއޭގައި ގާއިމުކުރާ ފަންޑެއްގަ އެވެ. މިކަމުގެ ސަބަބުން، އިތުބާރު ކުރެވޭ ނިޒާމެއްގެ ދަށުން، ރައްޔިތުންނަށް ޔަގީންކަން އޮންނާނެ އުސޫލެއްގެ ތެރެއިން، ޒަކާތު ފަންޑު ބަލަހައްޓާނެ ކަމަށް އިސްލާމިކް މިިސްޓްރީން ވަނީ ބުނެފައެވެ.
އެމްއެމްއޭއިން ވަނީ ‘އިސްލާމިކް ސޯޝަލް ފައިނޭސް އިކޯސިސްޓަމް’ އެއް ރާއްޖޭގައި ގާއިމް ކުރުމުގެ މަސައްކަތް ވެސް ފަށާފައެވެ. މި މަސައްކަތުގެ ޒަރިއްޔާއިން، ޒަކާތު ފަންޑްގެ މަސައްކަތްތައް އިތުރަށް ރަނގަޅުވެ، އިތުބާރު ކުރެވޭ ނިޒާމެއްގެ ތެރެއިން ޒަކާތާ ބެހޭ އެންމެހާ މުއާމަލާތްތަކެއް ކުރެވިގެންދާނެ އެވެ.
