ޝަރުތު ހަމަވާ 39 މީޑިއާއަކަށް ފައިސާ ދޭން މޯލްޑީވްސް މީޑިއާ އެންޑް ބްރޯޑްކާސްޓިން ކޮމިޝަނުން ފޮނުވައިފި އެވެ.
މީޑިއާ ކޮމިޝަނުން އިއްޔެ ނެރުނު ބަޔާނެއްގައި ބުނެފައިވަނީ ސަރުކާރުން މީޑިއާތަކަށް ދޫކުރާ މާލީ އެހީ ހޯދުމަށް އެދި ހުށަހެޅި މީޑިއާތަކުގެ ތެރެއިން ޝަރުތު ހަމަވި 40 މީޑިއާގެ ތެރެއިން 39 މީޑިއާއަކަށް މިވަގުތު ފައިސާ ދޫކުރުމަށް މިނިސްޓްރީ އޮފް ޔޫތު އެމްޕަވާމަންޓް، އިންފޮމޭޝަން އެންޑް އާޓްސްއަށް ފޮނުވާފައިވާކަމަށެވެ.
ސަރުކާރުން މީޑިއާތަކަށް ދޫކުރާ މާލީ އެހީ ހޯދުމަށް އެދި ހުށަހެޅި މީޑިއާތަކުގެ ތެރެއިން ޝަރުތު ހަމަވެފައި ވަނީ 41 މީޑިއާއެއް ކަމަށް މީޑިއާ ކޮމިޝަނުން ބުނެފައިވެއެވެ. މީގެ ތެރޭގައި 2 މީޑިއާއަކީ އެއް ކުންފުންޏަކުން ހިންގާ ދެ މީޑިއާ އަކަށްވާތީ، އެކަމާ ގުޅޭ ގޮތުން މީޑިއާ ކޮމިޝަނުން ވަނީ އެ މީޑީއާތަކާ ބައްދަލުކޮށް، އެކަން ހިނގާފައިވާ ގޮތުގެ މައުލޫމާތު އޮޅުން ފިލުވާފައިވާ ކަމަށް ވެސް ބަޔާނުގައިވެ އެވެ.
އެ މައްސަލަ ހައްލުކޮށް ނިމެންދެން ބާކީ ތިބި 39 މީޑިއާއަކަށް މާލީއެހީގެ ފައިސާ ދިނުމަށްޓަކައި މިނިސްޓްރީއާ ގުޅިގެން ކުރިއަށް ގެންދަމުން ކަމަށެވެ. އެހެންވެ، މީޑިއާތަކުން ދައުލަތުން ދޭ މަލީ އެހީ ލިބިގެން ދާނީ 40 މީޑިއާއަކަށް ކަމަށް މީޑިއާ ކޮމިޝަނުން ބުނެފައިވެ އެވެ.
