ރާއްޖޭގެ ސިޔާސަތުތައް ބިނާވެފައި ވަނީ އޯގާތެރިކަމުގެ މައަޗަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވެފައި ވަނީ ‘ވޯލްޑް ބްރައިލް’ ދުވަހުގެ މުނާސަބަތުގައި އެކްސްގައި ކުރައްވާފައިވާ ޕޯސްޓެއްގައެވެ. މި ޕޯސްޓްގައި ސަރުކާރުގެ އަމާޒަކީ އެއްވެސް މީހަކު ބާކީނުކޮށް، ކޮންމެ މީހަކަށް ވެސް ފަސޭހަކަމާއެކު ކަންކަން ކުރުމުގައި ބައިވެރިވެވޭނެ ފަދަ ނިޒާމެއް ރާއްޖޭގައި އުފެއްދުން ކަމަށް ރައީސް ވިދާޅުވެފައިވެއެވެ.
މި ޕޯސްޓުގައި ބްރައިލް ދުވަހެއް ފާހަގަ ކުރުމުގެ މުހިންމެކަމަކީ، ފެނުމުގެ ނުކުޅެދުންތެރިކަން ހުންނަ ފަރާތްތަކަށް އުގެނުމުގެ ފުރުސަތުތަކާއި، މިނިވަންކަމާއި އެމީހުންގެ އަގު ވަޒަން ކުރުން ކަމުގައި ރައީސް ފާހަގަކުރައްވާފައިވެއެވެ. އަދި ހަގީގީ މާނައިގައި އެންމެން ބައިވެރިކުރާ މުޖުތަމައެއް ބިނާ ކުރުމަކީ އެއްވެސް ހުރަހެއް ނެތި މައުލޫމާތާއި ފުރުސަތުތަކުގެ ބޭނުން، ހަމަހަމަކަމާއެކު ހިފޭނެ މަގު ތަނަވަސްކޮށް ދިނުން ކަމުގައި ވެސް ރައީސް ވިދާޅުވެފައިވެއެވެ.
‘ވޯލްޑް ބްރައިލް’ ދުވަސް ފާހަގަ ކުރަނީ ކޮންމެ އަހަރެއްގެ ޖެނުއަރީ 4ގައެވެ. ބައިނަލްއަގުވާމީ ގޮތުން މިފަދަ ދުވަހެއް ފާހަގަ ކުރުމުގެ މަގުސަދަކީ ފެނުމުގެ ނުކުޅެދުންތެރިކަން ހުންނަ ފަރާތްތަކަކީ މުޖުތަމައުގައި ބައިވެރި ކުރަންޖެހޭ، އެބަޔަކަށް އެހެންމީހުންގެ އަޅާލުން ބޭނުންވާ ބައެއްކަން ހަނދާން ކޮށްދިނުމެވެ. އަދި އެމީހުންނަށް ބޭނުންވާ އެހީތެރިކަން ފޯރުކޮށްދިނުމެވެ.
