ވެލާނާ އިންޓާނޭޝަނަލް އެއާޕޯޓް (ވީއައިއޭ) ގައި ހުއްްދަނެތި ވިޔަފާރި ކުރާ ފަރާތްތަކަށް ފިޔަވަޅު އަޅާނެ ކަމަށް އެމްއޭސީއެލުން ބުނެފި އެވެ.
އެމްއޭސީއެލުން ނެރެފައިވާ ބަޔާނެއްގައި ވެލާނާ އެއާޕޯޓުގައި ފަތުރުވެރިންނަށް ބޭނުންވާނެ އެންމެހާ ކަންކަން ފޯރުކޮށްދިނުމަށް އެކި ވިޔަފާރިތައް ކުރުމާއި ހިދުމަތްތައް ދިނުމުގެ ހުއްދަ ވަކި އުސޫލުތަކަކާއި އެއްބަސްވުންތަކެއްގެ ދަށުން ދޫކުރާނީ އެމްއޭސީއެލުން ކަމަށް ވަނީ ބުނެފަ އެވެ. އެހެންކަމުން، އެމްއޭސީއެލުން ބުނެފައިވާ އުސޫލުތަކާއި އެއްބަސްވުންތަކުގެ ދަށުން ހުއްދަ ދޫކުރެވިފައިވާ ފަރާތްތައް ފިޔަވައި އެހެން އެއްވެސް ފަރާތަކުން އެއާޕޯޓުގައި އެއްވެސް ބާވަތެއްގެ ވިޔަފާރިއެއް ކުރުމަކީ ނުވަތަ ހިދުމަތް ފޯރުކޮށްދިނުމަކީ މަނާ ކަމެއް ކަމަށް އެ ބަޔާނުގައި ބުނެފައިވެ އެވެ.
އެމްއޭސީއެލްއިން ބުނި ގޮތުގައި ހުއްދަ ނެތި އެއާޕޯޓުގައި އެއްވެސް ވިޔަފާރިއެއް ނުވަތަ ހިދުމަތެއް ފޯރުކޮށްދޭ ފަރާތެއް ފާހަގަކުރެވިއްޖެނަމަ، ކަމާ ގުޅޭ ސަލާމަތީ މުއައްސަސާތަކާއެކު އެފަދަ ވިޔަފާރިތަކަށް ގާނޫނާއި ގަވާއިދުގެ ދަށުން ފިޔަވަޅު އަޅާނެ ކަމުގަ އެވެ. އަދި އެފަދަ ފިޔަވަޅަކުން ވިޔަފާރިއަކަށް ލިބޭ އެއްވެސް ގެއްލުމަކަށް އެ ކުންފުނިން ޒިންމާ ނުވާނެ ކަމަށް ވެސް އެމްއޭސީއެލް އިން ވަނީ ބުނެފަ އެވެ.
އެފަދައިން ފިޔަވަޅު އެޅުމަށް އެމްއޭސީއެލުން ނިންމާފައި ވަނީ ފަތުރުވެރިންނާއި އެއާޕޯޓު ބޭނުންކުރާ އެންމެހާ ފަރާތްތަކުގެ ރައްކާތެރިކަން ކަށަވަރުކުރުމާއި، އެއާޕޯޓުގައި ދެވޭ ހިދުމަތްތަކުގެ ފެންވަރު ދެމެހެއްޓުމަކީ އެމްއޭސީއެލްގެ ޒިންމާއަކަށްވާތީ ކަމަށް އެ ކުންފުނިން ބުނެފައިވެ އެވެ.
އެހެންކަމުން، އެ ތަންތަނުން ހިދުމަތްދޭ ފަރާތްތަކުން ތިބެން ވާނީ ތަމްސީލް ކުރާ ޔުނިފޯމް ލައިގެން ނުވަތަ ފާހަގަވާނެ ފާސް ހިފައިގެން ކަމަށާއި އެއްބަސްވުމުގައި ކަނޑައެޅިފައިވާ ތަނުގެ ނުވަތަ ވަސީލަތުގެ ބޭރުން އަދި އެއްބަސްވުމުގައި ނެތް ހިދުމަތެއް ދިނުމަކީ އެ ފަރާތްތަކަށް ވެސް މަނާ ކަމެއް ކަމަށް އެމްއޭސީއެލުން ވަނީ ބުނެފަ އެވެ.
