ކޭ-ޕާކްގެ ފްލެޓްތައް މަކަރާއި ހީލަތުން ނުއަގުގައި ވިއްކި މައްސަލާގައި ދައުލަތުން ކުރި ދައުވާތައް ސާބިތުވި ހަސަން މަމްދޫހު (މަންޑޭ) 364 އަހަރަށް ޖަލަށްލުމަށް ކްރިމިނަލް ކޯޓުން ހުކުމްކޮށްފި އެވެ.
މަންޑޭ ވަނީ، ހަންބޯ ކޮމްޕެނީ ޕްރައިވެޓް ލިމިޓެޑުގެ ވެރިޔާގެ ސޮއި ފޯޖުކޮށްގެން ހަންބޯ ކޮމްޕެނީ ޕްރައިވެޓް ލިމިޓެޑްގެ ނަމުގައި ބޭންކް އެކައުންޓް ހުޅުވައި، ކޭ-ޕާކް ރެޒިޑެންސްގެ ނަމުގައި ހުޅުމާލޭގައި އިމާރާތްކުރަމުންދާ އެޕާރޓްމަންޓްތައް އޮޅުވާލާއިގެން މަކަރާއިހީލަތުން އެކި މީހުންނަށް ވިއްކާފައެވެ. އަދި، ބައެއް އެޕާރޓްމަންޓްތައް އެކަކަށްވުރެ ގިނަ މީހުންނަށް ވިއްކައި، އެފައިސާއަށް ހިޔާނާތްތެރިވެ އެފައިސާ ލޯންޑަރކޮށްފައިވާ މައްސަލާގައި ޓެކުމާއި، އޮޅުވާލުމާއި، ސައްހަނޫން ލިޔުން ދިނުމާއި، މަނީ ލޯންޑްރިން ކޮށްފައިވެއެވެ.
މި މައްސަލައިގަ ދައުލަތުން އޭނާގެ މައްޗަށް ކުރީ މަކަރާއި ހީލަތް ހެދުމުގެ 50 ދައުވާ އާއި އޮޅުވާލުމުގެ އަމަލެއް ކުރުމުގެ 50 ދައުވާ އާއި ސައްހަ ނޫން ލިޔުމެއް ދިނުމުގެ ތިން ދައުވާގެ އިތުރުން މަނީ ލޯންޑްރިންގެ ދައުވާ އެވެ. އޭގެ ތެރެއިން 94 ދައުވާ ސާބިތުވި ކަމަށް ކްރިމިނަލް ކޯޓުން ވަނީ މިދިޔަ ހަފްތާގައި ކަނޑައަޅާފަ އެވެ،
އެހެންކަމުން މަންޑޭގެ މައްޗަށް 104 ދައުވާއެއް 12 ޑިސެންބަރު 2023 ދުވަހު ކްރިމިނަލް ކޯޓަށް ހުށައަޅާފައިވެއެވެ. މީގެތެރެއިން 94 ދައުވާ ސާބިތުވެފައިވާކަމަށް ކްރިމިނަލް ކޯޓުން ވަނީ ހުކުމްކޮށްފައެވެ.
މަންޑޭގެ މައްޗަށް ކޮށްފައިވާ ދައުވާއާއި، އެދައުވާތަކުގެ އަދަބު:
- ޓެކުންގެ46 ދައުވާ – 364 އަހަރަށް ޖަލަށް
- އޮޅުވާލުމުގެ ޢަމަލެއް ކުރުމުގެ 44 ދައުވާ – 13 އަހަރާއި 2 މަހާއި 12 ދުވަހަށް ޖަލަށް
- މީހަކަށް ކަމެއް އޮޅުވާލުމުގެ ނިޔަތުގައި އެނގިހުރެ ސައްހަނޫން ލިޔުމެއް ދިނުމުގެ 3 ދައުވާ – 1 އަހަރާއި 4 މަހާއި 24 ދުވަހަށް ޖަލަށް
- މަނީ ލޯންޑްރިންގެ 1 ދައުވާ – 15 އަހަރަށް ޖަލަށްލުމާއެކު، 30 މިލިއަން ރުފިޔާއިން ޖޫރިމަނާ
އެހެންކަމުން މަންޑޭގެ މައްޗަށް މުޅިޖުމްލަ 393 އަހަރާއި، 7 މަހާއި، 6 ދުވަހަށް ޖަލަށްލުމާއެކު، 30 މިލިއަން ރުފިޔާއިން ޖޫރިމަނާކުރުން، އަދަބުގެ ގޮތުގައި ކަނޑައަޅާފައިވެއެވެ.
މަންޑޭގެ އިތުރުން ޖައިޝާން ސައީދުގެ މަށްޗަށް 89 ދައުވާއެއް ސާބިތުވެ 159 އަހަރާއި، 7 މަހަށް ޖަލަށްލުމާއެކު، 300 ހާސް ރުފިޔާއިން ޖޫރިމަނާކުރުން، އަދަބުގެ ގޮތުގައި ކުރިމިނަލް ކޯޓުން ވަނީ ކަނޑައަޅާފައެވެ. މަންޑޭއާއި ޖައިޝާންގެ މައްޗަށް ސާބިތުވެފައިވާާ ދައުވާތަކުގެ މުޅި ޖުމްލަ އަދަދަކީ 183 އެވެ.
މި މައްސަލާގައި ހަސަން މަމްދޫހްއާއި، ޖައިޝާން ސައީދުގެ މައްޗަށް ކޮށްފައިވާ ދައުވާތަކުގެ ތެރެއިން 16 ދައުވާއެއް ސާބިތުނުވާކަމަށް ކްރިމިނަލް ކޯޓުން ހުކުމްކޮށްފައިވެއެވެ. އެ ދައުވާތައް ސާބިތުނުވާކަމަށް ނިންމަވާފައިވަނީ އެ ދައުވާތަކާ ގުޅިގެން ބަދަލު ލިބޭ ފަރާތްތަކުން ހެކިބަސްދޭން ކޯޓަށް ހާޒިރުވެފައިނުވާތީކަމަށް ކުރިމިނަލް ކޯޓުން ބުނެފައިވެއެވެ.
