ޓެރަރިސްޓް ޖަމާއަތެއްކަމަށްވާ އިސްލާމިކް ސްޓޭޓްގެ (އައިއެސް)ގެ ޕްރޮޕެގެންޑާ ފެތުރި ހޫދު މުހައްމަދު ޒާހިރުގެ މައްޗަށް ކޮށްފައިވާ ދައުވާތަކުގެ އަދަބު ކަނޑައަޅައިފި އެވެ.
ހޫދު މުހައްމަދު ޒާހިރު ވަނީ ސޯޝަލް މީޑިއާގެ އެކި މަންސަތައް ބޭނުން ކޮށްގެން ތަފާތު އެކި ދުވަސްތަކުގައި ގިނަ ފޭކް އެކްއުންޓްތައް ހަދައި، އައި.އެސް.އައި.އެސް އާ ގުޅުންހުރި މައުލޫމާތާއި ހަބަރު ގެނެސްދޭ ސޯޝަލް މީޑިއާގެ އޮންލައިން ގްރޫޕްތަކުގައި ފަތުރާފައެވެ. އެގޮތުން އައި.އެސް.އައި.އެސް ޖަމާއަތުން ކުރަމުންދާ ނޭއްގާނީ އަމަލުތަކާއި ގުޅޭ، އެކި ބަސްބަހުން ތައްޔާރުކޮށްފައިވާ ލިޔުންތަކާއި، ފޮޓޯތަކާއި، ވީޑިއޯތައް ހިއްސާކުރުމުގައި ގިނަ ވަގުތުތަކެއް ހޭދަކޮށްފައިވެއެވެ.
މީގެއިތުރުން އޭނާ ވަނީ އައި.އެސް.އައި.އެސް ގެ ޕްރޮޕެގެންޑާ ފެތުރުމަށް ބޭނުންކުރާ ލިޔުންތައް އެހެން މީހުންނަށް ފޯރުކޮށްދީ، އެކި ބަސްބަހުން ތައްޔާރުކޮށްފައިވާ ލިޔެކިޔުންތައް ތަރުޖަމާކުރުމަށްޓަކައި އެކި މީހުންނާ މުއާމަލާތުކޮށްފައެވެ. އަދި ސޯޝަލް މީޑިއާގެ އެކި އޮންލައިން ޕްލެޓްފޯމްތަކުގައި އައި.އެސް.އައި.އެސް އަށް ތާއީދުކޮށް، އެކި ގައުމުތަކުގައި ތިބި އައި.އެސް.އައ.އެސް ޖަމާއަތަށް ތާއިދުކުރާ މީހުންނާ މުއާމަލާތުކޮށް، އެކަންކަން ކުރުމަށާއި ސިއްރުކުރުމަށާއި އޮޅުވާލުމަށް ބޭނުންކުރެވިދާނެ ތަފާތު އެކި އެކި އެޕްލިކޭޝަންތައް ގަނެގެން އައި.އެސް.އައި.އެސް ހަބަރު ފަތުރާ މީޑިއާ އޮޕަރޭޓްކުރާ މެންބަރެއްގެ ހައިސިއްޔަތުން މަސައްކަތް ކޮށްފައިވެއެވެ. އޭނާ ވަނީ 2015 ވަނަ އަހަރުން ފެށިގެން 2022 ޖެނުއަރީ ގެ ނިޔަލަށް މި މަސައްކަތް ކުރިއަށް ގެންގޮސްފައެވެ.
އައި.އެސް.އައި.އެސް އާ ގުޅުންހުރި މައުލޫމާތު ހިއްސާކޮށްފައިވާކަން ސާބިތުވެފައި ވާތީ އޭނާގެ މައްޗަށް ޖުމްލަ 5 ދައުވާއެއް 18 އޭޕްރީލް 2025 ދުވަހު ކްރިމިނަލް ކޯޓަށް ވަނީ ހުށައަޅާފައެވެ. އެގޮތުން 28 ޑިސެންބަރު 2025 ވަނަ ދުވަހު ކްރިމިނަލް ކޯޓުން މި މައްސަލައިގައި ހުކުމްކޮށްފައެވެ.
ހޫދު މުހައްމަދު ޒާހިރުގެ މައްޗަށް ސާބިތުވި ދައުވާތައް:
ދައުވާ 3: ޓެރަރިސްޓް ޖަމާއަތެއްގެ މެންބަރަކަށްވުން
ގާނޫނުގައިވާ އަދަބު: 10 އަހަރާއި 15 އަހަރާ ދެމެދުގެ މުއްދަތަކަށް ޖަލަށްލުން
ކަނޑައެޅުއްވި އަދަބު: 15 (ފަނަރަ) އަހަރަށް ޖަލަށްލުން
ދައުވާ 4: ޓެރަރިސްޓް ޖަމާއަތަކަށް ތާއީދުކުރުން
ގާނޫނުގައިވާ އަދަބު: 3 އަހަރާއި 5 ދެމެދުގެ މުއްދަތަކަށް ޖަލަށް ލުން
ކަނޑައެޅުއްވި އަދަބު: 5 އަހަރަށް ޖަލަށްލުން
ދައުވާ 5: ޓެރަރިސްޓް ޖަމާއަތަކަށް ތާއީދުކުރާ މީހެއްކަމަށް ދޭހަވާފަދަ ލިޔުމާއި، ކުރެހުމާއި، ފޮޓޯ ގެންގުޅުން
ގާނޫނުގައިވާ އަދަބު: 1 އަހަރާއި 3 އަހަރާއި ދެމެދުގެ މުއްދަތަކަށް ޖަލަށް ލުން
ކަނޑައެޅުއްވި އަދަބު: 3 އަހަރަށް ޖަލަށްލުން
ކަނޑައެޅި އަދަބުގެ ޖުމްލަ: 23 އަހަރަށް ޖަލަށްލުން
ސާބިތުނުވާކަމަށް ކޯޓުން ކަނޑައެޅީ އިންޓަނެޓް މެދުވެރިކޮށް ޓެރަރިޒަމްގެ އަމަލެއް ކުރުމަށް ހިތްވަރު ދިނުން ދައުވާ އާއި އިންޓަނެޓް މެދުވެރިކޮށް ޓެރަރިސްޓް ޖަމާއަތެއްގެ ލިޔެކިޔުންތައް ފެތުރުމުގެ ދައުވާ އެވެ.
