މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އާ ގުޅިގެން ބޮޑުތަކުރުފާނު މަގު ސެގްމަންޓް 2 ގައި ހުރި ގަސްތައް ހުޅުމާލެ ޗެނަލް ޕާކް ސަރަހައްދަށް ބަދަލުކުރުމުގެ މަސައްކަތް ފަށައިފި އެވެ.
އެމްޓީސީސީއިން ބުނި ގޮތުގައި މިހާރުވެސް ކާމިޔާބުކަމާއެކު ބައެއް ގަސްތައްވަނީ އަލުން އިންދާފަ އެވެ. މީ އެމްޓީސީސީގެ ކޮމިޓްމެންޓް ޓު ރެސްޕޮންސިބަލް ޕްރޮޖެކްޓް އިމްޕްލިމެންޓޭޝަން ގެ ދަށުން ކުރިޔަށް ގެންދާ މަޝްރޫއެކެވެ.
144 މިލިއަން ރުފިޔާއަށް ހިންގާ މި މަޝްރޫއުގެ ދަށުން 830 މީޓަރުގެ ސަރަހައްދެއް ތަރައްގީކުރާއިރު، މަގު 4 ލޭނަށް ފުޅާކޮށް، ހިނގާ މީހުންނަށް ވަކި ލޭނެއް ގާއިމުކޮށް ފެން ހިންދާ ނިޒާމެއް ގާއިމުކުރާނެ އެވެ. އެ މަޝްރޫއުގެ ފުރަތަމަ ސެގްމެންޓުގެ މަސައްކަތް ނިންމާލައި ފުލުހުންގެ ޝަހީދު ހުސެއިން އާދަމް ބިލްޑިން އިން ފެށިގެން މަސްމާރުކޭޓާ ހަމަޔަށް ވަނީ އާއްމުންނަށް މިހާރު ހުޅުވާލާފަ އެވެ.
ސެގްމެންޓް 2 އަކީ ލޯކަލް މާރުކޭޓުން ފަށައިގެން ނޯތު ހާބަރާ ހަމައަށް ހިމެނޭ 250 މީޓަރުގެ ސަރަހައްދެވެ.
