ސްޕެޝަލް އިކޮނޮމިކް ޒޯނުގެ ގާނޫނަށް ގެނައި އިސްލާހުތަކާއެކު އިންވެސްޓަރުންގެ އިތުބާރު ބޮޑުވެ، ރާއްޖޭގައި އިންވެސްޓްކުރުމަށް ޝައުގުވާ މިންވަރު އިތުރުވެފައިވާ ކަމަށް އިކޮނޮމިކް މިނިސްޓަރ މުހައްމަދު ސައީދު ވިދާޅުވެއްޖެ އެވެ.
މިނިސްޓަރ މިހެން ވިދާޅުވީ، އެސްއީއެޑް ގާނޫނުގެ ދަށުން ރާއްޖޭގައި ސަސްޓެއިނަބަލް ޓައުންޝިޕެއް ތަރައްގީކުރުމުގެ ހުއްދަ ކްރިސްޓަލް ހޯލްޑިގްސްއަށް ރަސްމީކޮށް ދިނުމަށް ބޭއްވި ރަސްމިއްޔާތުގައި ވާހަކަދައްކަވަމުންނެެވެ.
އެސްއީޒެޑް ގާނޫނެއް ފުރަތަމަ ފަހަރަށް އެކުލަވާލާ އަމަލުކުރަން ފެށީ 2014 ވަނަ އަހަރުއެވެ. މިކަމަށް އަލިއަޅުއްވާލައްވާ މިނިސްޓަރު ސައީދު ވިދާޅުވީ، ސްޕެޝަލް އިކޮނޮމިކް ޒޯނުގެ ޤާނޫނެއް ރާއްޖޭގައި ތަސްދީގުކުރެއްވުނީސުރެ ގާތްގަނޑަކަށް 12 އަހަރު ދުވަހުގެ ތެރޭގައި އެއްވެސް މަސައްކަތެއް ޕްރެކްޓިކަލީ ކުރެވިފައެއް ނެތްކަމަށެވެ.
ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ މެނިފެސްޓޯގައި ހިމެނޭ ވަރަށް ބޮޑު ޕިލާއެއް ނުވަތަ ވައުދަކީ ރާއްޖޭގެ އިގްތިސާދު ޑައިވާސިފައި ކުރުމެވެ. ވުމާއެކު ރާއްޖޭގައި އެހެނިހެން ސިނާއަތްތައް ކުރިއެރުވުމަށް އަދި ޓޫރިޒަމް ސިނާއަތްވެސް ސިންދަފާތުކުރުމަށް މަސައްކަތްތަކެއް ކުރެވެމުންދާކަމަށް މިނިސްޓަރު ވިދާޅުވި އެވެ.
ސައީދު ވިދާޅުވީ، ތަރައްގީގެ އެޖެންޑާގައި ފަހަތައް ސޮއްސާލާފައި ހުރި ކަންތައްތަކާއި ނުކޮށް ހުރި ކަންތައްތައް، އަދި ޒުވާން ޖީލު ބޭނުންވާ އަދި ނުކުރެވި ހުރި ކަންތައްތައް އެ ޖީލަށްޓަކައި ކޮށްދެއްވުމަށް ރައީސް މަސައްކަތްކުރައްވާ ކަމަށެވެ. އެގޮތުން ސްޕެޝަލް އިކޮނޮމިކް ޒޯން (ސީޒޯން) އެކްޓިވޭޓް ކުރެއްވުމަކީ އޭގެ ތެރެއިން ކުރެވުނު މުހިންމު ކަމެއް ކަމަށް ވިދާޅުވިއެވެ.
އެސްއީޒެޑް ގާނޫނަށް މި ގެނައި އިސްލާހާއެކު އިގުތިސާދީ މަސައްކަތްތައް ކުރުމަށް ވަކި ސަރަޙައްދެއް ދޫކުރާ ގޮތަށް މަޝްރޫއުތައް ހިންގުމަށް އިންވެސްޓަރުންނަށް ހުޅުވާލިއެެވެ. އަދި އެސްއީޒެޑްގެ ދަށުން މަޝްރޫއުތައް ހިންގުމުގެ ހުއްދަ ދޫކުރާ ބޯޑް އޮފް އިންވެސްޓްމަންޓުން މިހާރު ވަނީ ސަސްޓެއިނަބަލް ޓައުންޝިޕް ޕްރޮޖެކްޓެއް ހިންގުމުގެ ހުއްދަ ކްރިސްޓަލް ހޯލްޑިންގްސް ޕްރައިވެޓް ލިމިޓެޑަށް ދީފައެވެ.
