ހުޅުމާލޭގެ ހުރަވީ ސްކޫލްގައި ކާން އިން 13 އަހަރުގެ ކުއްޖަކު މިއަދު ނިޔާވެއްޖެ އެވެ.
ހުޅުމާލެ ހޮސްޕިޓަލްގެ އޮފިޝަލަކު ވިދާޅުވީ ސްކޫލަކުން އަންހެން ކުއްޖަކު އިމަޖެންސީގައި އެތަނަށް މިއަދު ގެންދިޔަ ކަމަށެވެ. އެތަނަށް ގެންދިޔައިރު ވެސް ކުއްޖާ ނިޔާވެފައިވާ ކަމަށް އޭނާ ވިދާޅުވި އެވެ.
ހުރަވީ ސްކޫލްގައި ނިޔާވީ ނ. ލަންދޫ، ފާތިމަތު ޝިމާ މުހައްމަދެވެ. ސްކޫލްގެ އިންޓަވަލްގަޑީގައި، އެ ކުއްޖާ ކާން އިންދައި ނިޔާވީ ކޮން ކަމަކާ ގުޅިގެން ކަމެއް އަދި ޔަގީނެއް ނޫނެވެ.
އެނގިފައިވާ ގޮތުގައި އެ ކުއްޖާއަކީ ދޭތެރެއަކުން ފިޓް ޖެހޭ ކުއްޖެކެވެ. ސްކޫލްގައި މިއަދު ވެސް އެ ކުއްޖާ ފިޓް ޖެހުނީ ކަމަށް މައުލޫމާތު އެނގޭ ބައެއް މީހުން ކިޔައިދެ އެވެ.
ލަންދޫ ދެމަފިރިންގެ ޝިމާއަކީ ތިން ކުދިން ތިބޭ އެ އާއިލާގެ އެންމެ ހަގު ކުއްޖާ އެވެ.
ފުލުހުން މީޑިއާތަކަށް ފޮނުވި މެސެޖުގައި ވަނީ، ހުޅުމާލޭގެ ހުރަވީ ސްކޫލުގެ ދަރިވަރަކަށް “ސިއްހީ ހާލަތެއް މެދުވެރިވެގެން” ހުޅުމާލެ ހޮސްޕިޓަލަށް ގެންދިޔަ ކަމަށެވެ. އޭރު އެ ކުއްޖާ ނިޔާވެފައިވާ ކަމަށް ހޮސްޕިޓަލާ ހަވާލާދީ ފުލުހުން ވެސް ވަނީ ކަށަވަރުކޮށްދީފަ އެވެ.
