ބޮޑުތަކުރުފާނު މަގު ޒަމާނީ ފެންވަރަށް ތަރައްޤީކުރުމުގެ މަސައްކަތަށް ސުނާމީ ބިނާ ސަރަޙައްދު ހުސްކުރަންމިނިސްޓްރީ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓް އިން އަންގައިފިއެވެ.
މާލޭގެ ބޮޑުތަކުރުފާނު މަގު ޒަމާނީ ފެންވަރަށް ތަރައްޤީކުރުމުގެ ބިޔަ މަޝްރޫޢުގެ ދަށުން، ސުނާމީ ބިނާއިން ފެށިގެން މޯލްޑިވްސް ޕޯޓްސް ލިމިޓެޑް (އެމްޕީއެލް) އާ ހަމައަށް މަގު ހެދުމުގެ ޢަމަލީ މަސައްކަތް ފެށުމަށް ވަނީ ތައްޔާރު ވެފައެވެ.
މި މަސައްކަތް ފެށުމުގެ ގޮތުން، އެ ސަރަޙައްދުގައި ހުރި ތަކެއްޗާއި އުޅަނދުފަހަރު ނެގުމަށް ކަމާބެހޭ ވުޒާރާއިން މިހާރު ވަނީ ޢާންމުކޮށް އަންގާ އިޢުލާނުކޮށްފައެވެ. އެގޮތުން، ސުނާމީ ބިނާއިން ފެށިގެން އެމްޕީއެލްއާ ދެމެދު ބޮޑުތަކުރުފާނު މަގުގައި ބަހައްޓާފައިވާ އެންމެހައި ތަކެއްޗާއި، ސުނާމީ ބިނާ ސަރަޙައްދުގައި އަޅާފައިވާ އުޅަނދުފަހަރުތައް، 03 އޮކްޓޫބަރު 2026 ވާ ހޮނިހިރު ދުވަހުގެ ރޭގަނޑު 11:00 ގެ ކުރިން އެ ސަރަޙައްދުން ނަގައި ހުސްކުރުމަށް ވަނީ އަންގަވާފައެވެ.
އަދި ކަނޑައެޅިފައިވާ މުއްދަތުގެ ފަހުން ނުނަގައި ހުންނަ ތަކެއްޗާއި، އެ ސަރަޙައްދުގައި އަޅާފައި ހުންނަ އުޅަނދުފަހަރުތައް މިނިސްޓްރީގެ ފަރާތުން ނަގައި ސަރަޙައްދު ސާފުކުރާނެ ކަމަށްވެސް އެ ވުޒާރާއިން މަޢުލޫމާތު ދެއްވައެވެ.
