އަމީނީމަގުގެ ދެވަނަ ސެގްމަންޓުގައި ތާރުއެޅުމުގެ މަސައްކަތް މިހާރު އެއްކޮށް ނިމިފައިވާ ކަމަށް އެމްޓީސީސީ އިން ބުނެފިއެވެ.
އެމްޓީސީސީ ބުނީ ފެންވަރު ރަނގަޅު މަގުތަކެއް ގާއިމުކުރެވުމުގެ ސަބަބުން، މާލޭގެ ރައްޔިތުންނަށް ދަތުރުފަތުރު ކުރުމުގައި ބޮޑެތި ލުއިފަސޭހަތަކެއް ލިބިގެންދާނެ ކަމަށެވެ. އަދި މީގެ ސަބަބުން މާލެއަކީ އެއްތަނުން އަނެއްތަނަށް ފަސޭހަކަމާއެކު ދަތުރުކުރެވޭ، ފުރިހަމައަށް ގުޅާލެވިފައިވާ ސިޓީއަކަށް ވެގެންދާނެ ކަމަށެވެ.
އަމީނީ މަގު ޒަމާނީ ފެންވަރަށް ތަރައްގީކުރުމުގެ މަޝްރޫއަކީ މާލޭގެ ދަތުރުފަތުރުގެ ނިޒާމު ހަރުދަނާކޮށް، މަގުތައް ބޭނުންކުރާ ފަރާތްތަކަށް ދިމާވާ ދަތިތަކަށް ހައްލެއް ހޯދުމަށްޓަކައި ސަރުކާރުން ވަރަށް ބޮޑު އިސްކަމެއް ދީގެން ކުރިއަށްގެންދާ މަޝްރޫއެކެވެ.
މި މަގު ހެދުމުގެ އަމަލީ މަސައްކަތް އެކި ސެގްމެންޓްތަކަށް ބަހާލައިގެން ކުރިއަށްގެންދާއިރު، މަގުގެ ދުއްވާ ސަރަހައްދުގެ ފެންވަރު ރަނގަޅުކުރުމުގެ އިތުރުން ފެންހިންދާ ނިޒާމު ހަރުދަނާކުރުމުގެ މަސައްކަތް ވެސް މި މަޝްރޫއުގެ ތެރެއިން ދަނީ ކުރަމުންނެވެ. އެމްޓީސީސީއާ ހަވާލުކޮށްގެން ކުރިއަށްގެންދާ މި މަސައްކަތްތައް ނިމުމުން، މާލޭގެ އެންމެ ބާރުބޮޑު އެއް މަގަށް ދިމާވެފައިވާ ހަލާކުވުމާއި ފެންބޮޑުވުމުގެ މައްސަލައަށް ދާއިމީ ހައްލެއް ލިބިގެންދާނެއެވެ.
މި މަޝްރޫއުގެ ދަށުން ފުރަތަމަ ސެގްމެންޓްގައި ތާރު އަޅާ ނިންމީ މި މަހުގެ15 ވަނަ ދުވަހު އެވެ.
