މަތީ ސާނަވީ އިމްތިހާނުގައި މިއަހަރު ބައިވެރިވާ ދިވެހި ހުރިހާ ދަރިވަރުންނަށް ރައިސުލްޖުމްހޫރިއްޔާ ޑރ. މުހައްމަދު މުއިއްޒު އާއި އެމަނުކުފާޏުގެ އަނބިކަނބަލަުން މެޑަމް ސާޖިދާ މުހައްމަދު ކާމިޔާބީ އަށް އެދިވަަޑައިގަންނަވައިފިއެވެ.
ރައީސް “އެކްސް” ގައި ކުރެވި ޕޯސްޓެއްގައި ވިދާޅުވެފައި ވަނީ ދަރިވަރުންގެ މުސްތަޤްބަލު ބިނާކުރުމުގައި އަދި ވަކީން ޚާއްޞަކޮށް، މަތީ ތަޢުލީމު އުނގެނޭނެ ދާއިރާއެއް ޚިޔާރުކޮށް ކުރިއަށް ދިއުމުގައި، މަތީ ސާނަވީ އިމްތިޙާނަކީ މުހިންމު މަރުޙަލާއެއް ކަމަށެވެ.
” އިރާދަކުރެއްވިއްޔާ، މި އިމްތިޙާނަށް ތައްޔާރުވުމަށް ތިޔަ ކުދީން ކުރި ބުރަ މަސައްކަތުގެ ފޮނިމޭވާ ލިބޭނެ. މާތްﷲގެ ހެޔޮ ރަޙްމަތްފުޅާއެކު، މި އިމްތިޙާނުގައި ފަސޭހައިން މޮޅަށް ޖަވާބުދީ، އެންމެން ފަޚުރުވެރިވާނެ ރަނގަޅު ނަތީޖާތަކެއް ތިޔަ ކުދީން ޤައުމަށް ހޯދައިދޭނެ ކަމަށް އުންމީދު ކުރަން.” ރައީސްގެ މެސެޖް ގައި ވިދާޅުވެފައި ވިއެވެ.
މެޑަމް ސާޖިދާގެ މެސެޖްގައި ވިދާޅުވެފައި ވަނީ ދަރިވަރުންނަށްޓަކައި މުޅި ޤައުމު ކުރަނީ ވަރަށް ފޮނި އުންމީދެއް ކަމަށާއި، ކުދިންގެ ބެލެނިވެރިންނާއި މުދައްރިސުން ފަޚުރުވެރިވާނެ ރަނގަޅު ނަތީޖާތަކެއް ހޯދައި، އުޖާލާ މުސްތަޤްބަލަކަށް މަގުފަހިކުރާނެކަމަށް އުންމީދުކުރައްވާ ކަމަށެވެ.
“މާތްﷲގެ ހެޔޮ ރަޙްމަތްފުޅާއެކު، ކޮންމެ ކުއްޖެއްގެ ހިތް އަލިކުރައްވައި، ތޫނުފިލިކަން އިތުރުކުރައްވައި، ޖަވާބުދިނުން ފަސޭހަކޮށްދެއްވާށި.” މެޑަމްގެ މެސެޖްގައި ވިދާޅުވެފައި ވިއެވެ.
