ކީރިތި ޤުރުއާން ކިޔެވުމުގެ 38 ވަނަ ޤައުމީ މުބާރާތުގެ ފަޚުރުވެރި ވަނަތައް އިސްމާޢީލް އިޒުޢާން އިބްރާހީމް، ޢާއިޝަތު ޒީކް ރިޔާޟް އަދި އާޔަން އަޙްމަދު ޢިނާން ހޯދައިފިއެވެ.
ރައީސްގެ ދެ ކަނބަލުން ވަނީ މި މުބާރާތް ޝަރަފުވެރިކޮށްދެއްވާ ރަންވަނަތަކަށް އައި ފަރާތްތަކަށް އިނާމު ދެއްވާފައެެވެ.
މި މުބާރާތުގެ ޙާފިޡުންގެ ގޮފިން މުޅި މުބާރާތުން އެއްވަނަ އިސްމާޢީލް އިޒުޢާން އިބްރާހީމް ހޯދާފައިވާއިރު، ނުބަލައި ކިޔެވުމުގެ ގޮފިން މުޅި މުބާރާތުން އެއްވަނަ ހޯދީ ޢާއިޝަތު ޒީކް ރިޔާޟްއެވެ. އަދި ބަލައިގެން ކިޔެވުމުގެ ގޮފިން މުޅި މުބާރާތުން އެއްވަނަ ޚާޞިލްކުރީ އާޔަން އަޙްމަދު ޢިނާންއެވެ.
މުޅި މުބާރާތުން ބަލައިގެން ކިޔެވުމުގެ ގޮފިންނާއި، މުޅި މުބާރާތުން ނުބަލާ ކިޔެވުމުގެ ގޮފިން އެއްވަނަ ބައިވެރިޔާ އާއި ޙާފިޘުންގެ ގޮފިންއ އެއްވަނަ ބައިވެރިޔާއަށް ރައީސުލްޖުމްހޫރިއްޔާގެ ޚާއްޞަ ހަނދާނީ ފިލާ، ރައީސުލްޖުމްހޫރިއްޔާ ދެއްވާ އެއްލައްކަ ރުފިޔާގެ ފައިސާގެ އިނާމު އަދި ބޭނުން ދާއިރާއަކުން ޕީ.އެޗް.ޑީއަށް ކިޔެވުމަށް ރައީސުލްޖުމްހޫރިއްޔާ ދެއްވާ ސްކޮލަރޝިޕް ވަނީ ޙަވާލުކޮށްދެއްވާފައެވެ.
މީގެ އިތުރުން ރައީސް ވަނީ ކީރިތި ޤުރުއާނާބެހޭ ޤައުމީ މަރުކަޒާއި ދީނީ ކަންކަމަށް އެހީވާ ވަޤުފު ފަންޑު ހިމެނޭހެން އިސްލާމީ ކަންތައްތަކާއި އަވްޤާފާ ބެހޭ ވުޒާރާއިންދޭ ފައިސާގެ އިނާމާއި މޯލްޑިވްސް ޙައްޖު ކޯޕަރޭޝަން ލިމިޓަޑުންދޭ ޢުމްރާ ދަތުރާއި ޓްރޮފީވެސް މިބައިވެރިންނާ ޙަވާލުކޮށްދެއްވާފައެވެ.
ރައީސް ޑރ، މުއިއްޒު މަޤާމުގެ ހުވާކުރެއްވި ދުވަހުން ފަށައިގެން ދިވެހިރާއްޖޭގައި ކީރިތި ޤުރުއާންގެ ޢިލްމު ވީހާވެސް ފުޅާކޮށް، ފެތުރެއްވުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ދެއްވަމުން ގެންދަވާ ޚާއްޞަ އިސްކަމުގެ ނަތީޖާއެއްގެ ގޮތުން، ކީރިތި ޤުރުއާން ކިޔެވުމުގެ ޤައުމީ މުބާރާތަކީ ދިވެހިރާއްޖޭގައި ބޭއްވޭ އެންމެ ޝަރަފުވެރި އަދި އެންމެ އަގުބޮޑު އިނާމުތައް ދެވޭ މުބާރާތަށް ވަނީ ހައްދަވާދެއްވާފައެވެ. ހަމަމިއާއެކު، ޤައުމީ މުބާރާތަށް މިހާރު ޚަރަދުކުރަނީ ސީދާ ދައުލަތުގެ ބަޖެޓުންނެވެ.
