މޫސުމީ ބަދަލުތަކުން ކުރާ ނޭދެވޭ އަސަރުތަކަށް ހޭނުމަށާއި އާމްދަނީ ހޯދުމުގެ ފުރުސަތު ފަހިކޮށްދިނުމަށް ސަރުކާރުން ކުރިއަށްގެންދާ ”ވިލުންވެށި“ ހިލޭ އެހީގެ ޕްރޮގްރާމް، އަންނަ އަހަރުގެ ތެރޭގައި ކުންފުނިތަކަށް ވެސް ހުޅުވާލަން ނިންމައިފިއެވެ.
މިކަން ހާމަ ކުރައްވާފައި ވަނީ ރައީސް އޮފީހުގައި ކުރިއަށް ދިޔަ ނޫސްވެރިންގެ ބައްދަލުވުމުގައި ވާހަކަ ދައްކަވަމުން މޫސުމީ ބަދަލުތަކާއި ތިމާވެއްޓާއި ހަކަތައާއި ބެހޭ ވަޒީރު އަލީ ޝަރީފު ނޫސް ވެރިންނާއި ބައްދަލު ކުރައްވާ ދެއްކެވި ވާހަކައިގައެވެ.
ވަޒީރު ވިދާޅުވީ މިކަމަކީ އިނޮވޭޓިވް އައިޑިއާ ތަކަށް ތަރުހީބު ދިނުމުގެ ގޮތުން ކުރާ މަސައްކަތެއް ކަމަށާއި މިހާރު ދޫކުރާ މިންވަރަށް ވުރެ އެހީގެ އަދަދު ބޮޑުވާނެ ކަމަށް ވެސް ވިދާޅުވިއެވެ.
މި ބަދަލު ގެންނަން ނިންމެވި ސަބަބު ބަޔާންކުރައްވަމުން އޭނާ ވިދާޅުވީ، މުޖުތަމައަށް ނުކުމެ މަސައްކަތް ފެށުމަށްޓަކައި އެހީތެރިކަމަކަށް ބޭނުންވެފައިވާ އީޖާދީ ވިސްނުންތަކުގެ ގިނަ ސްޓާޓްއަޕްތަކެއް އެބަތިބި ކަމަށާއި، މި ފުރުސަތުގެ ސަބަބުން އެފަދަ ވިޔަފާރިތަކަށް ބޮޑު ކުރިއެރުމެއް ލިބިގެންދާނެ ކަމަށް ވަޒީރު ފާހަގަ ކުރެއްވިއެެވެ.
މިދިޔަ ޖޫން މަހު ހުޅުވާލި ފުރުސަތުގައި ލިބުނު ޕްރޮޕޯސަލްތަކުގެ ތެރެއިން 150 ޕްރޮޕޯސަލެއް އިވެލުއޭޓް ކުރުމުގެ މަސައްކަތް މިނިސްޓްރީއާއި އެސްއެމްއީ ބޭންކް ގުޅިގެން މިހާރު ކުރިއަށްދާ ކަމަށް މިނިސްޓަރު ވިދާޅުވިއެވެ.
އޭޝިއަން ޑިވެލޮޕްމަންޓް ބޭންކް (އޭޑީބީ) ގެ މާލީ އެހީތެރިކަމާއެކު، އެންވަޔަރަންމަންޓް މިނިސްޓްރީ އާއި އެސްއެމްއީ ޑިޖިޓަލް ގުޅިގެން ކުރިއަށްގެންދާ މި ޕްރޮގްރާމްގެ ދަށުން، މިހާރު ވަކިވަކި ފަރުދުންނަށް ދޫކުރަމުން ދަނީ ގިނަވެގެން 100،000 ރުފިޔާއެވެ.
